ໃນໂອກາດທີ່ບໍລິສັດໂຕໂຢຕ້າ ມໍເຕີ້ ປະເທດໄທ ຈຳກັດ ຈັດງານແຂ່ງຂັນແຕ້ມຮູບໃນຫົວຂໍ້ "ຍົນຕະກຳແຫ່ງອະນາຄົດ ລົດໂຕໂຢຕ້າ ໃນຝັນຂອງຂ້ອຍ ຄັ້ງທີ 2" ທີ່ໄດ້ຈັດຂຶ້ນຢູ່ນະຄອນຫຼວງວຽງຈັນ ເມື່ອບໍ່ດົນຜ່ານມານີ້ ບໍລິສັດ ໄດ້ມອບຖະໜົນຈຳລອງ ຈຳນວນ 1 ຊຸດ ໃຫ້ກັບພະແນກຕຳຫຼວດຈະລາຈອນນະຄອນຫຼວງວຽງຈັນ ເພື່ອໃຊ້ເຂົ້າໃນການຝຶກອົບຮົມດ້ານການຂັບຂີ່ປອດໄພທາງຖະໜົນ ກ່າວມອບໂດຍທ່ານ ບິນ ສິນຮຸ່ງເຮືອງ ຜູ້ອຳນວຍການຝ່າຍເຂດການຂາຍປະເທດລາວ ບໍລິສັດໂຕໂຢຕ້າ ມໍເຕີ້ ປະເທດໄທ ຈຳກັດ ແລະ ກ່າວຮັບໂດຍທ່ານຮ້ອຍໂທ ຫຼຽນໄຊ ມົງຄົນຄຳ ແລະ ທ່ານຮ້ອຍໂທ ສັງຄົມ ພົມມະລາດ ຮອງຫົວໜ້າກອງໂຄສະນາຈະລາຈອນນະຄອນຫຼວງວຽງຈັນ.
ນີ້ແມ່ນບາດກ້າວໜຶ່ງທີ່ບໍລິສັດ ໄດ້ມີສ່ວນຮ່ວມໃນກິດຈະກຳສົ່ງເສີມສັງຄົມ ພ້ອມກັນເຂົ້າຮ່ວມໂຄງການຫຼຸດຜ່ອນອຸປະຕິເຫດຕາມທ້ອງຖະໜົນ ເຮັດໃຫ້ປະກົດການຫຍໍ້ທໍ້ທາງອຸບັດເຫດຢູ່ນະຄອນຫຼວງ ນັບມື້ຫຼຸດລົງເທື່ອລະກ້າວ ຊຶ່ງຖະໜົນຈຳລອງນີ້ ເປັນອຸປະກອນໜຶ່ງເພື່ອໄວ້ຮອງຮັບໃຫ້ແກ່ການຈັດກິດຈະກຳຄວາມປອດໄພດ້ານການຂັບຂີ່ ໃຫ້ແກ່ເດັກເຍົາວະຊົນລາວ ທີ່ມີອາຍຸຕ່ຳກ່ວາ 10 ປີ ເປັນການປູກຈິດສຳນຶກໃຫ້ເຂົາເຈົ້າໄດ້ຮຽນຮູ້ຄວາມປອດໄພການຂັບຂີ່ຕາມທ້ອງຖະໜົນແຕ່ໄວເຍົາ.
