ວາງສີລາລຶກໂຄງການກໍ່ສ້າງອາຄານສຳນັກງານສູນກາງສະຫະພັນກຳມະບານລາວ
ພິທີວາງສີລາລຶກໂຄງການກໍ່ສ້າງອາຄານສຳນັກງານສູນກາງສະຫະພັນກຳມະບານລາວ ແລະ ໂຮງແຮມຣາມາຢານາ ບູຕິກ ຈຳກັດ ຊຶ່ງໄດ້ຈັດຂຶ້ນໃນວັນທີ 21 ຕຸລາ 2011 ນີ້ຢູ່ນະຄອນຫລວງວຽງຈັນ.
ເຂົ້າຮ່ວມໃນການວາງສີລາລຶກຄັ້ງນີ້ ມີທ່ານ ຄຳຫລ້າ ລໍລອນສີ ກຳມະການສູນກາງພັກ, ປະທານສູນກາງສະຫະພັນກຳມະບານລາວ, ມີຮອງປະທານ, ທ່ານ ຕະມິງເຈົາ ເອກອັກຄະລັດຖະທູດວິຊາມັນເຕັມແຫ່ງ ສສ ຫວຽດນາມ ພ້ອມດ້ວຍກຳມະການຜູ້ຈັດການໂຮງແຮມຣາມາຢານາ ບູຕິກ ຈຳກັດ ແລະ ຜູ້ຈັດການທົ່ວໄປຕາງຫນ້າກຸ່ມບໍລິສັດແສນເພັດການຄ້າເຂົ້າຮ່ວມ ວາງສີລາຈາລຶກໂຄງການກໍ່ສ້າງອາຄານສຳນັກງານສູນກາງສະຫະພັນກຳມະບານລາວ.
ການກໍ່ສ້າງອາຄານສຳນັກງານສູນກາງສະຫະພັນກຳມະບານລາວຫລັງໃຫມ່ ໃນລະດັບ 4 ຊັ້ນ 1 ຫລັງ, ກໍ່ສ້າງອາຄານໂຮງແຮມຣາມາຢານາບູຕິກ ໃນລະດັບ 5 ດາວ 7 ຊັ້ນ 1 ຫລັງ ພື້ນທີ່ການກໍ່ສ້າງໂຄງການມີ 5.074 ຕາແມັດ, ມູນຄ່າການກໍ່ສ້າງ ແລະ ຕົບແຕ່ງ 10 ລ້ານໂດລາສະຫະລັດ.
ຫລັງຈາກນັ້ນກໍ່ໄດ້ເຊັນສັນຍາລະຫວ່າງເຈົ້າຂອງໂຄງການກັບ ບໍລິສັດ ຮັບເຫມົາກໍ່ສ້າງ ຊຶ່ງໄດ້ກຳນົດໄລຍະເວລາຈັດຕັ້ງປະຕິບັດໂຄງການໃຫ້ສຳເລັດແມ່ນ 18 ເດືອນນັບແຕ່ມື້ລົງມືກໍ່ສ້າງເປັນຕົ້ນໄປ. ຫລັງຈາກສຳເລັດການກໍ່ສ້າງແລ້ວຈະຕ້ອງໄດ້ມີການມອບ - ຮັບໂຄງການລະຫວ່າງຜູ້ຮັບເຫມົາກໍ່ສ້າງ ແລະ ເຈົ້າຂອງໂຄງການ. ສະນັ້ນໃນເມື່ອໂຄງການນີ້ຫາກໄດ້ຮັບການກໍ່ສ້າງ ສຳເລັດຈະເປັນການປະກອບສ່ວນອັນສຳຄັນ ແລະ ຈະເປັນຜົນປະໂຫຍດອັນສູງສຸດໃຫ້ແກ່ພັກ - ລັດ ແລະ ອົງການຈັດຕັ້ງກຳມະບານລາວໃນອະນາຄົດ.
