(ຂປລ): ການຫ້າງຫາກະກຽມ ບຸນຊ່ວງເຮືອປະເພນີທ່າວັດຈັນ ນະຄອນຫລວງວຽງຈັນນັ້ນ ຈະມີຄວາມແຕກຕ່າງຫລາຍຈຸດ ຈາກຊຸມປີຜ່ານມາ ໂດຍສະເພາະ ເມືອງຈັນທະບູລີ ຈະສຸມໃສ່ 4 ສໍ (ສະຫງົບ, ສະອາດ, ສະຫວ່າງ ແລະ ສີຂຽວ) ເປັນມາດຕະຖານ ໃນຄວບຄຸມ ແລະ ຈັດການບໍລິຫານໃຫ້ມີປະສິດທິຜົນ ພ້ອມດຽວກັນນັ້ນ ກໍຈະເນັ້ນໃຫ້ມີການອະນຸລັກຮີດຄອງປະເພນີອັນດີງາມ ດ້ວຍການສົ່ງເສີມ-ໂຄສະນາ ໃຫ້ປະຊາ ຊົນນຸ່ງຫົ່ມໃຫ້ຕ້ອງຕາມຮີດຄອງດັ້ງເດີມ ແລະ ຈະຫ້າມບໍ່ໃຫ້ປະຊາຊົນໃຊ້ໂຟມ ຫລື ສິ່ງຂອງປະເພດເປັນຢາງຕ່າງໆທີ່ເປື່ອຍຍາກ ສຳລັບເຮັດເປັນເຮືອໄຟ.
ທ່ານ ແສງພອນ ສຸວັນນີ, ຮອງເຈົ້າເມືອງໆຈັນທະບູລີ ນະຄອນຫລວງວຽງຈັນ ໄດ້ໃຫ້ສຳພາດຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 3 ຕຸລາ 2011 ນີ້ວ່າ: ການຫ້າງຫາກະກຽມບຸນຊ່ວງເຮືອປະເພນີທ່າວັດຈັນ ນະຄອນຫລວງວຽງຈັນ ຈະເລີ່ມ 7-13 ຕຸລາ 2011, ປີນີ້ຈະມີການຈັດການບໍລິຫານ ແລະ ຄຸ້ມຄອງ ເປັນລະບົບທີ່ຕ່າງຈາກປີກາຍ ເພື່ອໃຫ້ສອດຄ່ອງກັບສະພາບຄວາມເປັນຈິງ ແລະ ຖືກັບຮີດຄອງປະເພນີໃຫ້ຫລາຍຂຶ້ນກວ່າປີຜ່ານມາ ຄື: 1. ຈະເນັ້ນຄວາມເປັນ ລະບົບຮຽບຮ້ອຍ ໂດຍສົມທົບກັບຫລາຍພາກສ່ວນກ່ຽວຂ້ອງ ໃຫ້ມີການເພີ່ມກຳລັງຕຳຫລວດເຂົ້າເຄື່ອນໄຫວ ແລະ ກວດກາໃນຫລາຍກຸ່ມຄົນ ທີ່ປະຕິບັດ ໂຕບໍ່ຖືກຕ້ອງເປັນຕົ້ນ ຫ້າມບໍ່ໃຫ້ມີການຄ້າຂາຍ ແລະ ນໍາອາວຸດທີ່ເປັນອັນຕະລາຍ ເຂົ້າໄປຂ້າງໃນເດັດຂາດ, ຈະມີໜ່ວຍງານຕິດຕາມກວດກາເບີ່ງ ຜູ້ນຸ່ງຖື ໃນເວທີໂຄສະນາສີນຄ້າໃຫ້ເໝາະສົມ ພ້ອມເລັ່ງລະດົມໃຫ້ປະຊາຊົນນຸ່ງເຄື່ອງໃຫ້ເໝາະສົມໃນເວລາເຂົ້າໄປຫລີ້ນ ຫລື ໄຫລເຮືອໄຟ, ໃນແຕ່ລະຈຸດ ຈະມີເຈົ້າໜ້າ ທີ່ສະເພາະກິດ 4 ຄົນໃຫ້ການຊ່ວຍເຫລືອ-ຕິດຕາມ ສຳລັບຜູ້ເຂົ້າໄປໄຫລເຮືອໄຟ ດ້ວຍການເຮັດລະບຽງ ຫລື ເປັນເຂດຄັກແນ່ສຳ ລັບຜູ້ມີຈຸດປະສົງເຂົ້າໄປ ໄຫລເຮືອໄຟ;
2. ຈະເປີດໂອກາດໃຫ້ບໍລິສັດ ເຂົ້າໄປປະມູນເອົາວຽກງານອະນາໄມ ແລະ ຮັກສາຄວາມສະອາດຢ່າງເປັນລະບົບ ເພື່ອຮັບປະກັນຄວາມສະອາດ-ຈົບງາມ ພາຍຫລັງຊິ້ນສຸດບຸນ;
3. ຮັບປະກັນຕົ້ນໄມ້ ແລະ ສວນສາທາລະນະ ໃຫ້ຢູ່ໃນສະພາບທີ່ດີເໜືອນເດີມ ແລະ ເພີ່ມໄຟແສງສີໃນແຕ່ລະຂົງເຂດ ໃຫ້ມີຄວາມສະຫວ່າງຂຶ້ນຕື່ມ. ນອກນັ້ນ ພວກເຮົາຍັງໄດ້ເປີດໂອກາດໃຫ້ 3 ບໍລິສັດເອກະຊົນລາວ ເຂົ້າມາປະມູນກ່ຽວກັບການຈັດການບໍລິຫານ ແລະ ກຳນົດ ເປັນເຂດຄ້າຂາຍເປັນລະອຽດ ເປັນຕົ້ນ ແມ່ນຂອບເຂດຝາກລົດຈັກ-ລົດໃຫຍ່, ຮ້ານຂາຍເຄື່ອງປະເພດສິນຄ້າຕ່າງໆ, ຮ້ານບັນເທີງ ແລະ ຮ້ານອາຫານ. ແນວໃດກໍດີ ທ່ານຮອງເຈົ້າຄອງຍັງກ່າວຕື່ມອີກວ່າ: ລາຄາຄ່າຝາກລົດ ແລະ ເຊົ່າສະຖານທີ່ ຈະສູງຂຶ້ນຕື່ມອີກ ຖ້າທຽບກັບປີຜ່ານມາ ເນື່ອງຈາກວ່າສະພາບ ເສດຖະກິດ ແລະ ຄ່າຄອງຊີບນັ້ນເອງ ເຊັ່ນວ່າ: ຄ່າຝາກລົດຈັກ ເພີ່ມຂຶ້ນເປັນ 10 ພັນກີບ/ຄັນ, ລົດຕຸກໆ 15 ພັນກີບ/ຄັນ ແລະ ລົດໃຫຍ່ 25 ພັນກີບ/ຄັນ;
ຄ່າເຊົ່າດິນເພື່ອປຸກຮ້ານຂະໜາດ 4 ແມັດ X 4 ແມັດ ປະມານ 150.000 ກີບ-250.000 ກີບ, ສະຖານທີ່ບັນເທີງ ແລະ ສວນສະໜຸກນັ້ນ ແມ່ນປະມານ 10 ລ້ານ-55 ລ້ານກີບ/ບ່ອນ ໂດຍຂຶ້ນກັບຂະໜາດ ແລະ ເງື່ອນໄຂຕົວຈິງ. ສ່ວນລາງວັນຜູ້ຊະນະເລີດອັນດັບທີ 1 ຈະເພີ່ມຂຶ້ນເປັນ 10 ລ້ານກີບພ້ອມຂັນເງິນ, ທີ 2 ແມ່ນຈະຮັບເງິນ 8 ລ້ານກີບພ້ອມຂັນ ໂດຍຕາມລຳດັບ ແລະ ລະບຽບເວລາຄົບງັນ ຫລື ຫລິ້ນ ຈະກຳນົດໃຫ້ຢຸດປະມານ 11:30 ໂມງ ຕອນ ກາງຄືນ ຫລື 23:30 ໂມງ./. ກັບສາລະບານ
