ລຸງແມ່ນຜູ້ອ່ານປະຈຳ ຄັນບໍ່ໄດ້ອ່ານມື້ໜຶ່ງກິນເຂົ້າກະບໍ່ແຊບ ຫງຸດຫງິດ ມຸດໝັດແນວໃດບຸ ? ມື້ນີ້ເລີຍຂໍມີສ່ວນຮ່ວມນຳ ຄັນເຫັນວ່າມັນມີປະໂຫຍດກໍຊ່ວຍພິມລົງໃຫ້ແດ່ ລຸງມີ 2 ເລື່ອງທີ່ຂໍຍົກຂຶ້ນມາສົນທະນາໃນທາງສ້າງສັນ ບໍ່ໄດ້ໂຈມຕີໃຜດອກ.
1. ເວລາຄູບາອາຈານເພິ່ນເທດ ຫຼື ເຜີຍແຜ່ທຳມະ ບາງເທື່ອກໍອອກວິທະຍຸ-ໂທລະພາບ ແມ່ນສອນໃຫ້ຄົນກະທຳດີ ແຕ່ຄູບາໜຸ່ມບາງອົງ ເວົ້າສັບພາສາໄທບັກຫຼາຍໆ ຊ້ຳບໍ່ພໍ ບາງອົງເທດເປັນສຳນຽງໄທອ້ອຍຕ້ອຍ.
ລຸງຮູ້ວ່າ: ຄູບາອາຈານຫຼາຍອົງ ເພິ່ນຮຽນຈົບມາແຕ່ປະເທດໄທ ນອກຈາກນີ້ ຕຳລາຫຼາຍອັນ ກໍນຳເອົາປຶ້ມໄທເຂົ້າມາ ແລ້ວເຮົາຊິພາກັນປ່ອຍປະໃຫ້ມັນເປັນໄປແນວນີ້ໄປເລີຍເບາະ ? ໂດຍສະເພາະ ເວລາເພິ່ນໄປສອນເດັກນ້ອຍເຍົາວະຊົນ ຊາວໜຸ່ມ ເຂົາຊິບໍ່ເອົາເປັນແບບຢ່າງບໍ ?.
ເພິ່ນຍັງຝາກຂໍ້ແລກປ່ຽນແນະນຳມາວ່າ: ອົງການພຸດທະສາດສະໜາສຳພັນລາວ ຄວນເປັນເຈົ້າການ ສົມທົບກັບກະຊວງສຶກສາທິການ ແລະ ກີລາບໍ ? ຄວນກ່າວເຕືອນ ຫຼື ວາງວິໄນໃນການເທດອອກບໍ ? ປຶ້ມທຳມະກໍຄວນແປ ແລະ ພິມອອກຫຼາຍໆ ແລ້ວຢາຍໃຫ້ທຸກໆວັດ.
2. ດຽວນີ້ ເຫັນຂ່າວຄາວຂອງປະເທດເພື່ອນບ້ານ ມີປະກົດການຄູບາເຮັດຜິດວິໄນສົງ ເຊັ່ນ: ລັກມີຊູ້ມີແຟນ ກາງຄືນໃສ່ໝວກ ນຸ່ງໂສ້ງ ໜີວັດໄປມົ້ວສຸມ ຫຼື ກະທຳຜິດທຳມະວິໄນ ປະປົນກັນລະຫວ່າງທາງໂລກ ແລະ ທາງທຳ ເພິ່ນວ່າ: ຢ້ານມັນລອຍຂ້າມຂອງມາ ເລື່ອງນີ້ເຈົ້າອາວາດແຕ່ລະວັດຕ້ອງຮູ້ດີ.
ລຸງຝາກບອກວ່າ: ຢາກໃຫ້ຊ່ວຍ ຕັດໄຟແຕ່ຕົ້ນລົມ ເພາະສາດສະໜາພຸດ ແມ່ນສູນລວມໃຈຂອງຄົນລາວທຸກຄົນ ຈົ່ງຊ່ວຍກັນຮັກສາ.
ຈາກ: ລຸງຄຳເມືອງສີໂຄດ
