ມະຫາວິທະຍາໄລແຫ່ງ ຊາດລາວ (ມຊ) ຮ່ວມກັບມະຫາວິທະຍາໄລວິທະຍາສາດ ແລະ ເຕັກໂນໂລຊີ ຄຸນມິງແຫ່ງ ສປ ຈີນ ຈັບມືເປີດຫລັກສູດປະລິນຍາເອກ ສາຂາວິທະຍາສາດ ການບໍລິຫານປີທຳອິດ ຫວັງພັດທະນາຊັບພະຍາກອນມະນຸດ ເຊິ່ງມີອາຈານສອນຈຳນວນຫນຶ່ງຈາກລາວ ແລະ ຈີນ. ນັກສຶກສາເຂົ້າຮຽນແລ້ວ 30 ຄົນ.
ນັບເປັນໃບຫນ້າອັນໃຫມ່ຂອງມະຫາວິທະຍາໄລແຫ່ງຊາດລາວທີ່ໄດ້ ຕັດສິນໃຈກ້າວເດີນຢ່າງບໍ່ຢຸດຢັ້ງ ເພື່ອຍົກລະດັບການສຶກສາກໍ່ຄືຊັບພະຍາກອນມະນຸດ ໃຫ້ທຽບເທົ່າລະດັບສາກົນເທື່ອລະກ້າວ ເລ່ງຕອບສະຫນອງຄວາມຮຽກຮ້ອງຕ້ອງການທາງດ້ານເສດຖະກິດ-ສັງຄົມ ປະຈຸບັນໃນຂັ້ນຕອນທີ່ ສປປ ລາວ ກ້າວເຂົ້າສູ່ການພັດທະນາເສດຖະກິດອຸດສາຫະກຳ.
ພິທີເປີດຫລັກສູດປະລິນຍາ ເອກສາຂາວິທະຍາສາດການບໍລິຫານໂດຍການຮ່ວມມືລະຫວ່າງມະຫາວິ ທະຍາໄລແຫ່ງຊາດລາວ ແລະ ມະຫາວິທະຍາໄລວິທະຍາສາດ ແລະ ເຕັກໂນ ໂລຊີຄຸນມິງ ແຫ່ງ ສປ ຈີນ ຈັດຂຶ້ນເມື່ອວັນທີ 28 ມິຖຸນາທີ່ ຫ້ອງປະຊຸມໃຫຍ່ຄະນະເສດຖະສາດພາຍໃຕ້ການເປັນປະທານຂອງທ່ານ ສຈ. ດຣ. ສຸກກົງແສງ ໄຊຍະເລີດ ກຳມະການສູນກາງພັກ ອະທິການບໍດີມະຫາວິທະຍາໄລແຫ່ງຊາດ, ທ່ານ ຮສຈ. ດຣ. ກອງສີ ແສງມະນີ ລັດຖະມົນຕີຊ່ວຍວ່າການກະຊວງສຶກສາທິການ ທ່ານ ສຈ. ດຣ. ໂຈຫລົງ ອະທິການບໍດີມະຫາວິທະຍາໄລວິທະຍາສາດ ແລະ ເຕັກໂນໂລຊີ ຄຸນມິງ ແຫ່ງ ສປ ຈີນ ພ້ອມນັກສຶກສາ, ຄູ-ອາຈານເຂົ້າຮ່ວມຢ່າງຫລວງຫລາຍ.
ທ່ານ ສຈ.ດຣ. ສຸກກົງແສງ ໄຊຍະເລີດ ອະທິການບໍດີມະຫາວິທະຍາໄລແຫ່ງຊາດລາວກ່າວ ຕໍ່ພິທີເປີດວ່າ: ການຮ່ວມມືລະຫວ່າງສອງວິທະຍາໄລລາວຄຸນມິງ ໄດ້ເຊັນສັນຍາວ່າດ້ວຍການກໍ່ສ້າງຊັບພະຍາກອນມະນຸດຂອງຊາດແຕ່ປີ 2004 ເຊິ່ງໄດ້ເປີດສອນໃນປີ 2005 ຫລັກສູດປະລິນຍາໂທສາຂາບໍລິຫານການເງິນສາກົນມີ 5 ຮຸ່ນ ມີນັກສຶກສາເຂົ້າຮຽນທັງຫມົດ 154 ຄົນ ມີຄົນລາວ 137 ຄົນ.
ຢ່າງໃດກໍ່ດີ ເພື່ອຕອບສະຫນອງກັບແນວທາງການກໍ່ສ້າງຊັບພະຍາກອນມະນຸດຂອງຊາດ ໂດຍສະເພາະຂະແຫນງການເງິນທີ່ ສປປ ລາວ ເຊື່ອມໂຍງກັບສາກົນນັບມື້ນັບຫລາຍຂຶ້ນ ແລະ ຂະແຫນງໂລຈິດສະຕິກກໍ່ມີຄວາມສຳຄັນ. ດັ່ງນັ້ນ ຈິ່ງໄດ້ເປີດຫລັກສູດລະດັບປະລິນຍາເອກໃນສາຂາວິທະຍາສາດ ການບໍລິຫານ ແນໃສ່ສ້າງວິຊາການລະດັບສູງທີ່ລົງເລິກ 5 ຂະ ແຫນງມີ: ວິສະວະກຳການເງິນ, ວິສະວະກຳໂລຈິດສະຕິກ, ວິສະວະກຳການຕະຫລາດ, ການບໍລິຫານໂຄງການ ແລະ ການບໍລິຫານຊັບພະຍາກອນມະນຸດ.
ໂຄງການເປີດສອນຫລັກສູດປະລິນຍາເອກ ສາຂາວິທະຍາສາດການບໍລິຫານໄດ້ເຊັນສັນຍາກັນໃນວັນທີ 7 ເມສາ 2010 ໄດ້ເປີດສອນຕົວຈິງແຕ່ວັນທີ 11 ຕຸລາ 2010 ມີນັກສຶກສາເຂົ້າຮຽນທຳອິດ 30 ຄົນ, ຊາວຕ່າງປະເທດ 1 ຄົນ, ມາຈາກບັນດາ ກະຊວງທີ່ສຳຄັນ, ອາຈານຈາກມະຫາວິທະຍາໄລແຫ່ງຊາດລາວ, ພາກເອກະຊົນ ແລະ ທຸລະກິດສ່ວນຕົວລະ ບົບການສອນເປັນພາສາອັງກິດ 100% ຄ່າໃຊ້ຈ່າຍທັງຫມົດຜູ້ຫນຶ່ງຕົກຢູ່ປະມານ 8.500 ໂດລາສະຫະລັດຕໍ່ປີ ແຖມຍັງອຳນວຍຄວາມສະດວກໄປທັດສະນະສຶກສາ ແລະ ເກັບກຳຂໍ້ມູນຢູ່ມະຫາວິທະຍາໄລວິທະຍາສາດເຕັກໂນໂລຊີ ຄຸນມິງ ເມື່ອຈົບຫລັກສູດທາງ ມຊ ແຫ່ງຊາດລາວຈະອອກໃບປະກາສະນິຍະບັດໃຫ້ໂດຍກົງ. ຖ້າຫາກນັກສຶກສາຕ້ອງການໃບປະກາສະນິຍະບັດຈາກມະຫາ ວິທະຍາໄລວິທະຍາສາດ ແລະ ເຕັກໂນໂລຊີ ຄຸນມິງ ກໍ່ຕ້ອງຈ່າຍ ຄ່າລົງທະບຽນເພີ່ມອີກ 1.500 ໂດລາສະຫະລັດ.
ເປັນຂ່າວທີ່ດີ ທີ່ປະເທດລາວເຮົາຈະໄດ້ມີຄົນມີຄວາມຮູ້ສູງໆ
ສຳລົບ ຜຂ ຄົງຈະສູ້ບໍ່ໄຫວ 8500 ໂດລາຕໍ່ປີ
