ນ້ຳຕົກຕາດຟານເປັນນ້ຳຕົກຝາແຝດແຫ່ງດົງຫົວສາວ ຫລື ເອີ້ນອີກຢ່າງຫນຶ່ງວ່າ: ນ້ຳຕົກຕາດດົງຫົວສາວທີ່ສູງທີ່ສຸດຂອງລາວປະມານ 200 ແມັດ ຕັ້ງຢູ່ເຂດຊານເມືອງຂອງເມືອງປາກຊ່ອງ ແຂວງຈຳປາສັກ ຍ້ອນພູຜາປ່າໄມ້ ແລະ ສິ່ງແວດລ້ອມອ້ອມຮອບພູພຽງບໍລະເວນ, ພູເຂົາ, ປ່າໄມ້ຕາມທຳມະຊາດປົກຫຸ້ມແຖບນີ້ ເຮັດໃຫ້ສະພາບອາກາດຊຸ່ມຊື່ນຫນາວເຢັນຕະຫລອດປີ.
ນ້ຳຕົກຕາດຟານ ເປັນຊື່ເອີ້ນທີ່ມີປະຫວັດຄວາມເປັນມາຈົນມາເຖິງປະຈຸບັນນີ້ (ຕາດຄືນ້ຳຕົກຈາກຫີນ ຫລື ພູເຂົາ. ສ່ວນ ຟານ ຄືຊື່ຂອງສັດທີ່ອາໄສຢູ່ໃນປ່າຊະນິດຫນຶ່ງ) ນ້ຳຕົກຕາດຟານແຫ່ງນີ້ເປັນນ້ຳຕົກຕາດທີ່ສູງທີ່ສຸດຂອງປະເທດລາວ ທີ່ມີຄວາມສູງປະມານ 200 ແມັດ ຫາກເຮົາ ຂີ່ລົດຕາມເສັ້ນທາງເລກທີ 23 ເສັ້ນທາງໄປປາກຊ່ອງ ມາເຖິງຫລັກກິໂລແມັດທີ 38 ມີທາງ ແຍກເຂົ້າຂວາມື ຈະເຫັນປ້າຍບອກຂຽນຊື່ໃສ່ວ່າ: ຕາດຟານ ຫລື ນ້ຳຕົກຕາດຫົວສາວຈຸດເດີນທາງຢູ່ຊື່ກັບສາຍນ້ຳ 2 ສາຍທີ່ໄຫລຈາກຫນ້າຜາສູງມີສາຍນ້ຳກ້ຳຊ້າຍມືທີ່ໄຫລມາຈາກຫ້ວຍຜັກກູດ ແລະ ຂວາມືເປັນສາຍນ້ຳທີ່ໄຫລມາຈາກສວນອຸທິຍານແຫ່ງຊາດດົງຫົວສາວ ມີຈຸດຊົມທິວທັດທີ່ຕັ້ງຢູ່ຄົນລະຟາກພູກັບບ່ອນນ້ຳຕົກໃນລະດັບຄວາມສູງເທົ່າໆກັນຈາກ ບ່ອນນີ້ສາມາດຊົມທິວທັດນ້ຳຕົກໃນມຸມສູງໄດ້ຢ່າງຊັດເຈນ ແລະ ຍາມເຊົ້າຍັງເປັນຈຸດຊົມທະເລຫມອກທີ່ສວຍງາມອີກດ້ວຍ.
ພະນັກງານອະນຸຮັກແຫລ່ງທ່ອງທ່ຽວປະຈຳເຂດນັ້ນກ່າວວ່າ: ນັກທ່ອງທ່ຽວໃຫ້ຄວາມສົນ ໃຈກັບຄວາມງາມຂອງທຳມະຊາດທີ່ສ້າງຂຶ້ນເອງອາກາດເຢັນສະບາຍ, ອົບອຸ່ນ ແມ່ນແຕ່ລະ ດູຮ້ອນກໍ່ຍັງເຢັນເຫມືອນກັບລະດູໃບໄມ້ຫລົ່ນ ແລະ ປະຫລາດໃຈກັບນ້ຳທີ່ຖອກລົງມາຈາກຕີນພູ ດ້ວຍຄວາມແຮງທັງມີຫມອກຂາວຄວັນກຸ້ມຢູ່ຕະຫລອດ ແລະ ນ້ຳຕົກຕາດຟານເປັນນ້ຳ ຕົກຕາດທີ່ເກີດຈາກການໄຫລມາລວມກັນຂອງສາຍນ້ຳຂອງພູເຂົາ 2 ຫນ່ວຍ ເຊິ່ງໄຫລຕະຫລອດຫມົດປີ ມີຄວາມສູງປະມານ 200 ແມັດ ຕົ້ນໄມ້ສູງທັງສອງຂ້າງເບິ່ງຄືກັບລຽນແບບໄວ້ ເພື່ອປົກຄຸມນ້ຳຕົກຄູ່ແຝດແຫ່ງນີ້.
ບັນຍາກາດໂດຍຮອບຂອບນ້ຳຕົກຕາດຟານ ເປັນເສັ້ນທາງສູ່ເມືອງປາກຊ່ອງ ອ້ອມຮອບນ້ຳຕົກຕາດຟານຈະເຕັມໄປດ້ວຍປ່າໄມ້ນາໆພັນ ອັນສົມບູນອັນສວຍສົດງົດງາມຂອງທຳມະຊາດ ເປັນສະເຫນຂອງປ່າພູເຂົາທຳມະຊາດ ເຮັດໃຫ້ແຂກຜູ້ມາຢ້ຽມຢາມ ໄດ້ຊື່ນຊົນ,ສໍາຜັດບັນຍາກາດ ແລະ ພາຍໃນບໍລິເວນດັ່ງກ່າວ ນອກນັ້ນ ຍັງມີຣີສອດໃກ້ໆຕິດກັບຂອບນ້ຳຕົກອ້ອມຮອບໄວ້ ສຳລັບທ່ານທີ່ມັກສະຖານທີ່ພັກຜ່ອນແບບຣີສອດທຳມະຊາດລາວໃຕ້ ເມືອງປາກຊ່ອງທີ່ຕິດທຳມະຊາດ ນັ້ນຄືຕາດຟານຣີສອດນັ້ນເອງ ເປັນຣີສອດທີ່ທ່ານພັກແລ້ວຈະບໍ່ຜິດຫວັງກັບຄວາມສະດວກສະບາຍ, ການບໍລິການ, ສິ່ງທີ່ເອື້ອອຳນວຍຄວາມສະດວກໃຫ້ກັບທ່ານ ບວກກັບຄວາມງາມຂອງ ທຳມະຊາດ, ສະພາບແວດລ້ອມໃນເຂດນ້ຳຕົກປ່າພູເຂົາລຳເນົາ ໄພຂອງເຜົ່າລາວໃຕ້.
ຄວາມຝັນຂອງຂ້ອຍ ຢາກມີດິນມີບ້ານຫລັງນຶ່ງແຖວນີ້ລະ
ກາງຄືນນອນກອດເມັຽຟັງສຽງນໍ້າຕົກ, ສະຫວັນເມືອງຄົນ.
