ລັດຖະບານແຫ່ງ ສປປ ລາວ ມີຄວາມຕັດສິນໃຈສູງທີ່ຈະສ້າງຂົວຂ້າມແມ່ນ້ຳຂອງຂຶ້ນອີກ 1 ແຫ່ງທີ່ເມືອງໂຂງ ແຂວງຈຳປາສັກເຊິ່ງນັບເປັນແຫ່ງທີ 2 ຂອງແຂວງ ແລະ ທີ 6 ຂອງປະເທດ ໂດຍຈະໃຊ້ງົບຫລາຍກວ່າ 30 ລ້ານໂດລາສະຫະລັດ ເປັນທຶນກູ້ຢືມຈາກ ສປ ຈີນລັດຖະບານເຫັນໄດ້ຄວາມ ສຳຄັນໃນການປັບປຸງ ແລະພັດທະນາພື້ນຖານໂຄງ ລ່າງຢູ່ພາກໃຕ້ຂອງລາວ ໂດຍສະເພາະແມ່ນປັບປຸງ ແລະ ກໍ່ສ້າງເສັ້ນທາງ, ທ່າເຮືອ ແລະກໍ່ສ້າງ ຂົວຂ້າມນ້ຳຂອງແນໃສ່ອຳນວຍຄວາມສະດວກໃຫ້ແກ່ການຄົມມະນາຄົມຂົນສົ່ງ ແລະ ການໄປ-ມາຫາສູ່ຂອງພໍ່ແມ່ປະຊາຊົນ.
ໃນນັ້ນ ສຳລັບໂຄງການກໍ່ສ້າງຂົວຂ້າມແມ່ນ້ຳຂອງເມືອງ ໂຂງແຂວງຈຳປາສັກ ກໍ່ແມ່ນຫນຶ່ງໃນໂຄງການບຸລິມະສິດທີ່ລັດຖະບານໄດ້ເອົາໃຈໃສ່ໃນການຈັດຕັ້ງປະຕິບັດ ເພື່ອສ້າງຄວາມສະດວກໃນຫລາຍດ້ານໃຫ້ແກ່ປະຊາຊົນຢູ່ເຂດດັ່ງກ່າວ ໂດຍສະເພາະການຄົມມະນາຄົມ, ຄ້າຂາຍ, ບໍລິການ ແລະ ດ້ານການທ່ອງທ່ຽວ ເນື່ອງຈາກເຂດ ເມືອງໂຂງມີເກາະດອນນ້ອຍໃຫຍ່ຢ່າງຫລວງຫລາຍ ແລະ ມີສະຖານທີ່ທ່ອງທ່ຽວທາງດ້ານວັດທະນະທຳ ແລະ ທຳມະຊາດທີ່ງົດງາມຫລາຍແຫ່ງເປັນຕົ້ນແມ່ນສະຖານທີ່ທ່ອງທ່ຽວທາງທຳມະຊາດນ້ຳຕົກຕາກຫລີ່ຜີຄອນພະເພັງທີ່ມີຊື່ສຽງດັງກ້ອງໄປທົ່ວໂລກ.
ຢ່າງໃດກໍ່ດີ ງົບປະມານທີ່ຈະນຳໃຊ້ເຂົ້າໃນໂຄງການດັ່ງກ່າວ ແມ່ນມີທັງຫມົດ 32 ລ້ານກວ່າໂດລາສະຫະລັດ ໂດຍເປັນທຶນກູ້ຢືມຈາກທະນາຄານຂາເຂົ້າຂາອອກຂອງ ສປ ຈີນ ທີ່ໄດ້ມີການເຊັນສັນຍາກູ້ເງິນຢ່າງເປັນທາງການເມື່ອວັນທີ 28 ເມສາຜ່ານມານີ້ ທີ່ກະຊວງການເງິນ ນະຄອນຫລວງວຽງຈັນ ລະຫວ່າງ ທ່ານ ສົມດີ ດວງດີ ລັດຖະມົນຕີວ່າ ການກະຊວງການເງິນ ແລະ ທ່ານ ລີລູກູ ປະທານ ທະນາຄານຂາອອກຂາເຂົ້າຂອງ ສປ ຈີນ.
ທ່ານ ຄຳຮຸ່ງ ນຸຜາໄຊ ຫົວຫນ້າໂຄງການດັ່ງກ່າວເຜີຍໃຫ້ຮູ້ເມື່ອທ້າຍອາທິດຜ່ານມາວ່າ: ໂຄງການກໍ່ສ້າງຂົວຂ້າມແມ່ນ້ຳຂອງເມືອງໂຂງແມ່ນຈະໄດ້ຈັດຕັ້ງປະຕິບັດ 4 ກິດຈະ ກຳໃຫຍ່ຄື: ກິດຈະກຳກໍ່ສ້າງຂົວແຕ່ບ້ານຫາດຫາບ້ານນາມີຄວາມຍາວ 718 ແມັດ, ກວ້າງ 11 ແມັດ ສ້າງຂົວແຕ່ບ້ານຫົວໂຂງແຫລມຫາຫາງດອນສັນຍາວ 180 ແມັດ, ກວ້າງ 5 ແມັດ, ກໍ່ສ້າງເສັ້ນທາງຂຶ້ນ-ລົງຂົວແລະທ່າບັກ, ກິດຈະກຳກໍ່ສ້າງປູທາງຢາງເຂົ້າຫາຫົວຂົວຂ້າມນ້ຳຂອງເມືອງໂຂງ (ແຍກທາງ 13 ໃຕ້) ຍາວ 4.200 ແມັດ, ກວ້າງ 7 ແມັດ.
ໂດຍໂຄງການດັ່ງກ່າວໄດ້ມີການລົງສຳຫລວດ-ອອກແບບພ້ອມທັງຄິດໄລ່ມາແຕ່ສົກປີ 2009 ແລະ ໄດ້ລົງມືປະຕິບັດນັບແຕ່ທ້າຍເດືອນເມສາ 2011 ເປັນຕົ້ນມາ ຄາດຈະໃຫ້ສຳເລັດໃນອີກ 3 ປີຕໍ່ຫນ້າ ໂດຍບໍລິສັດຈາກ ສປ ຈີນ ເປັນຜູ້ຮັບເຫມົາກໍ່ສ້າງ.
ຫາກໂຄງການນີ້ສຳເລັດຈະເປັນຜົນດີຕໍ່ການພັດທະນາເສດຖະກິດ-ສັງຄົມກໍ່ຄືມີຄວາມສະດວກໃນການລຳລຽງຂົນສົ່ງສິນຄ້າຂອງປະຊາຊົນ, ຊ່ວຍປະຢັດເວລາໃນການເດີນທາງ ຂອງປະຊາຊົນໃຫ້ສັ້ນລົງ ແລະ ຮັບປະກັນຕໍ່ການເກີດອຸບັດເຫດທາງນ້ຳ, ສະດວກໃນການສັນຈອນໄປ-ມາ ແລະ ຈະເປັນເງື່ອນໄຂທີ່ດີໃນການເຊື່ອມຕໍ່ຄົມມະນາຄົມຂົນສົ່ງລະຫວ່າງ ເມືອງໂຂງກັບບັນດາເມືອງ, ແຂວງ ແລະ ຕ່າງປະເທດໄດ້ອີກ.
Ecom
ດີໃຈນໍາຫລາຍໆເດີທີ່ປະຊາຊົນຈະໄດ້ຮັບຜົນປະໂຫຍດຈາກຂົວແຫ່ງນີ້, ຂອບໃຈ
ທ່ານຄໍາໃຕຫລາຍໆ ໃຫ້ທ່ານມີອາຍຸໜັ້ນຂວັນຍືນເດີ.
ເງີນຈີນ ຈີນຮັບເໜົາ ວັດຖຸການກໍ່ສ້າງແມ່ນຂອງຈີນອີກຫວາ? ຖ້າເປັນແນວນັ້ນ ລາວກໍ່ໄດ້ໝີ້ກັບໄດ້
ຂົວໃຫ້ນາງດາວເຮືອງຂີ່ໄປສົ່ງເຂົ້າໃຫ້ທ່ານຄໍາໃຕ ປະຊາຊົນກໍ່ມີຜົນດີດ້ວຍ, ດີໆໆໆໆໆ.
