ລັດຖະບານຍີ່ປຸ່ນ ໄດ້ສືບຕໍ່ໃຫ້ການຊ່ວຍເຫຼືອໂຄງການເກັບກູ້ລະເບີດແຫ່ງຊາດ ປະຈຳປີ 2011 ມູນຄ່າ 744.680 ໂດລາ ເພື່ອນຳໃຊ້ເຂົ້າໃນການປະຕິບັດວຽກງານເກັບກູ້ລະເບີດຢູ່ແຂວງ ສາລະວັນ ແລະ ເຊກອງ.
ພິທີເຊັນສັນຍາຮັບເອົາການຊ່ວຍເຫຼືອດັ່ງກ່າວ ໄດ້ຈັດຂຶ້ນວັນທີ 25 ມີນາ 2011 ທີ່ໂຄງການເກັບກູ້ລະເບີດແຫ່ງຊາດ ລະຫວ່າງ ທ່ານ ບຸນປອນ ໄຊຍະເສນ ອຳນວຍການໂຄງການເກັບກູ້ລະເບີດແຫ່ງຊາດ ແລະ ທ່ານນາງ ຈູນໂກະ ໂຢໂກຕະ ເອກອັກຄະລາຊະທູດຍີ່ປຸ່ນ ປະຈຳ ສປປ ລາວ ເຊິ່ງມີທ່ານນາງ ອ່ອນຈັນ ທຳມະວົງ ລັດຖະມົນຕີວ່າການກະຊວງແຮງງານ ແລະ ສະຫວັດດີການ-ສັງຄົມ ບັນດາທ່ານຜູ້ຕາງໜ້າຈາກສຳນັກງານ ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງເຂົ້າຮ່ວມ.
ປີນີ້ເປັນປີທີ 6 ທີ່ລັດຖະບານຍີ່ປຸ່ນ ໃຫ້ການຊ່ວຍເຫຼືອ ເຊິ່ງມາເຖິງປັດຈຸບັນ ມີມູນຄ່າທັງໝົດ 8,7 ລ້ານໂດລາ ໂດຍການຊ່ວຍເຫຼືອຢູ່ 4 ແຂວງ ຄື: ຊຽງຂວາງ ສາລະວັນ ເຊກອງ ແລະ ອັດຕະປື.
ປັດຈຸບັນໂຄງການເກັບກູ້ລະເບີດແຫ່ງຊາດ ໄດ້ຮັບການຊ່ວຍເຫຼືອຈາກບັນດາປະເທດຕ່າງໆ ເຊັ່ນ: ອົດສະຕຣາລີ ເຢຍລະມັນ ຍີ່ປຸ່ນ ໄອແລນ ສະຫະພາບເອີລົບ ລຸກຊຳບວກ ໂປໂລຍ ສະວິດເຊີແລນ ນອກແວ ນິວຊີແລນ ອັງກິດ ແລະ ສະຫະລັດອາເມລິກາ ນອກນັ້ນຍັງມີການຊ່ວຍເຫຼືອຈາກອົງການຈັດຕັ້ງສາກົນ ແລະ ມູນນິທິຕ່າງໆຕື່ມອີກ.
