ຖ້າໃຜໄດ້ອ່ານໜັງສືພິມວຽງຈັນໃໝ່ສະບັບວັນທີ 11 ເດືອນກຸມພາ ປີ2011 ອາດຈະມັກຂ່າວນີ້ຫລາຍ ແຕ່ບໍ່ຮູ້ວ່າເພິ່ນລົງຂ່າວຢັ່ງໃຈປະຊາຊົນຊື່ໆເບາະຫລືແນວໃດ໋? ເພິ່ນຂ່າວວ່າຈັ່ງຊີ້:ໃນປັດຈຸບັນ ພວກເຮົາພວມຢູ່ໃນລະບອບປະຊາທິປະໄຕ ປະຊາຊົນ ໃນໄລຍະແຫ່ງການກໍ່ສ້າງປະຖົມປັດໄຈ ໃຫ້ແກ່ການຂ້າມຜ່ານຂຶ້ນສູ່ສັງຄົມນິຍົມ ສະນັ້ນ ການສ້າງລັດແຫ່ງກົດໝາຍ ກໍແມ່ນພາກສ່ວນທີ່ສຳຄັນທີ່ສຸດ ແລະ ເປັນພື້ນຖານໃຫ້ແກ່ລະບອບປະຊາທິປະໄຕປະຊາຊົນ ດັ່ງນັ້ນ ການສ້າງກົດໝາຍ ແມ່ນຕ້ອງສ້າງຂຶ້ນໂດຍຮັບປະກັນ ສິດຜົນປະໂຫຍດຂອງປະຊາຊົນ ໂດຍປະຊາຊົນ ແລະ ເພື່ອຜົນປະໂຫຍດຂອງປະຊາຊົນຢ່າງແທ້ຈິງ ແລະ ຕ້ອງໄປຄຽງຄູ່ກັບການຂະຫຍາຍປະຊາທິປະໄຕ ຢ່າງໜັກແໜ້ນ ແລະ ນັບມື້ນັບຄົບຖ້ວນເທື່ອລະກ້າວ.ກົດໝາຍແມ່ນການສະແດງອອກຂອງມານະຈິດ ຂອງຊົນຊັ້ນປົກຄອງ ທີ່ເປັນລາຍລັກອັກສອນ ໝາຍຄວາມວ່າ ກົດໝາຍຂອງລະບອບໃດ ກໍຕ້ອງສ່ອງແສງເຖິງມານະຈິດ ຂອງຊົນຊັ້ນປົກຄອງໃນລະບອບນັ້ນ ໃນລະບອບປະຊາທິປະໄຕປະຊາຊົນຂອງພວກເຮົາ ກໍຕ້ອງສ່ອງແສງໃຫ້ເຫັນເຖິງລັກສະນະຊົນຊັ້ນ ລັກສະນະຊາດ ແລະ ລັກສະນະປະຊາຊົນຂອງລັດພວກເຮົາ ໃນການສ້າງກົດໝາຍ ຕ້ອງກຳແໜ້ນທີ່ສຸດ ແນວທາງແຜນນະໂຍບາຍຂອງພັກ ກຳແໜ້ນສະພາວະຄວາມເປັນຈິງ ທາງດ້ານເສດຖະກິດ-ສັງຄົມຂອງປະເທດເຮົາ ຊຶ່ງລວມເອົາບັນຫາຮີດຄອງປະເພນີອັນດີງາມຂອງຊາດຂອງເຜົ່າຕ່າງໆ ແລະ ຈິດຕະສາດຂອງປະຊາຊົນບັນດາເຜົ່າ ໂດຍເລີ່ມຈາກການເຮັດແຕ່ຕ່ຳຫາສູງ ແລະ ສອດຄ່ອງກັບລະດັບການຂະຫຍາຍຕົວທາງດ້ານເສດຖະກິດ-ສັງຄົມ ວັດທະນະທຳ ຄວາມຮັບຮູ້ ແລະ ລະດັບຊີວິດການເປັນຢູ່ຂອງປະຊາຊົນ ປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວບັນດາເຜົ່າ ໄດ້ເວົ້າວ່າ ຕ້ອງສ້າງປະຊາທິປະໄຕໃນການສ້າງກົດໝາຍ ເພື່ອຢາກໃຫ້ກົດໝາຍແທດກັບຕົວຈິງ ສ່ອງແສງໄດ້ມານະຈິດ ສອດຄ່ອງກັບຜົນປະໂຫຍດອັນຊອບທຳ ຄວາມມຸ່ງມາດປາຖະໜາ ແລະ ເໝາະສົມກັບຄວາມສາມາດໃນການຈັດຕັ້ງປະຕິບັດຂອງປະຊາຊົນ ພວກເຮົາຈະຕ້ອງຮູ້ຍາດແຍ່ງຄວາມຄິດຄວາມເຫັນຂອງມະຫາຊົນ ກ່ຽວກັບກົດໝາຍນັ້ນ ໝາຍຄວາມວ່າກ່ອນຈະຮັບຮອງເອົາ ແລະ ປະກາດໃຊ້ກົດໝາຍໃດໜຶ່ງ ຈະຕ້ອງໄດ້ຜ່ານການທາບທາມຄວາມຄິດຄວາມເຫັນ ຂອງປະຊາຊົນຊັ້ນຄົນຕ່າງໆເສຍກ່ອນ ຫາກບໍ່ແມ່ນຈະເຮັດແຕ່ໃນວົງແຄບຂອງນັກວິຊາການ ຫຼື ກຳມາທິການກົດໝາຍຂອງສະພາເທົ່ານັ້ນ.ສະນັ້ນ ກົດໝາຍທີ່ຈະສ້າງຂຶ້ນໃນຕໍ່ໜ້າ ຈະຕ້ອງມີຄວາມຮັດກຸມ ຈະແຈ້ງ ແລະ ມີລັກສະນະສະເພາະ ແລະ ສອດຄ່ອງກັບລະດັບໃນດ້ານຕ່າງໆຂອງປະຊາຊົນ ແລະ ທີ່ສຳຄັນ ຈະຕ້ອງສ້າງຂຶ້ນໄປຄຽງຄູ່ກັບການເສີມຂະຫຍາຍປະຊາທິປະໄຕ ປະຊາຊົນ ພາຍໃຕ້ການນຳພາຂອງພັກຢ່າງໜັກແໜ້ນ ມີແຕ່ເຮັດແນວນັ້ນ ກົດໝາຍທີ່ສ້າງຂຶ້ນ ຈຶ່ງມີຄຸນນະພາບ ເໝາະສົມ ແລະ ໃຊ້ໄດ້ຢ່າງແທດເຖິງກັບສະພາວະຄວາມເປັນຈິງຂອງສັງຄົມ.
