ທາງການແຂວງວຽງຈັນ ວາງແຜນການທີ່ຈະດຳເນີນການກໍ່ສ້າງເມືອງໃໝ່່ທີ່ເປັນສູນກາງ ໃນການບໍລິຫານງານຂອງແຂວງໃຫ້ແລ້ວສຳເລັດໃນປີ 2020 ໂດຍຈະໃຊ້ງົບປະມານຫຼາຍ ກວ່າ 150 ລ້ານໂດລາ.
ລາຍງານໂດຍ ຊົງຣິດ ໂພນເງິນ | ບາງກອກ 02-10-2011
ຮູບຈໍາລອງຂອງແຫລ່ງທ່ອງທ່ຽວທີ່ຈະສ້າງຢູ່ຕໍ່ໜ້າເຂື່ອນຜະລິດໄຟ ຟ້ານໍ້າງື່ມ ທີ່ແຂວງວຽງຈັນ
ທ່ານ ອຸດົງ ພົງໄພປະດິດ ຫົວໜ້າຫ້ອງການ ແລະການລົງທຶນປະຈຳແຂວງວຽງຈັນໄດ້ຖະແຫຼງຢືນຢັນວ່າທາງການແຂວງວຽງຈັນໄດ້ຈັດທຳແຜນການກໍ່ສ້າງ ແລະພັດທະນາເມືອງໃໝ່ເພື່ອໃຫ້ເປັນເມືອງສູນກາງໃນການບໍລິຫານແລ້ວໃນຂະນະນີ້.
ໃນແຜນການດັ່ງກ່າວໄດ້ມີການແບ່ງການດຳເນີນວຽກອອກເປັນ 2 ໄລຍະດ້ວຍກັນກໍຄືໄລຍະທີ 1 ຈະເປັນການດຳເນີນງານລະຫວ່າງປີ 2011-2015 ຊຶ່ງຈະເປັນການກໍ່ສ້າງພື້ນຖານໂຄງຫລ່າງຕ່າງໆເຊັ່ນຖະໜົນຫົນທາງແລະການວາງຜັງເມືອງເພື່ອຮອງຮັບເຂດເມືອງໃໝ່. ສ່ວນໄລຍະທີ 2 ທີ່ຈະເປັນການດຳເນີນງານລະຫວ່າງປີ 2016-2020 ນັ້ນກໍຈະເປັນການກໍ່ສ້າງອາຄານ ແລະສໍານັກງານຕ່າງໆລວມເຖີງການຈັດວາງສິ່ງອຳນວຍຄວາມສະດວກຕ່າງໆເຊັ່ນໄຟຟ້າ, ນ້ຳປະປາ ແລະສວນສາທາລະນະເປັນຕົ້ນ.
ແຕ່ຢ່າງໃດກໍຕາມເນື່ອງຈາກວ່າ ການດຳເນີນງານຕາມແຜນການດັ່ງກ່າວນີ້ຈຳຕ້ອງໃຊ້ງົບປະມານຄິດເປັນມູນຄ່າລວມຫຼາຍກວ່າ 1,200 ຕື້ກີບ ຫຼືເກີນກວ່າ 150 ລ້ານໂດລາ ຊຶ່ງເກີນຄວາມສາມາດໃນດ້ານງົນປະມານຂອງແຂວງວຽງຈັນ ຈຶ່ງເຮັດໃຫ້ຈຳເປັນຕ້ອງເພິ່ງ ພາການສະໜັບສະໜູນຈາກລັດຖະບານລາວລວມທັງການຂໍຄວາມຊ່ວຍເຫືລອ ແລະກູ້ຢືມຈາກຕ່າງປະເທດເປັນດ້ານຫລັກ.
