ຂ່າວ: ຈັນທະຫວິນ
ລັດຖະບານຕັດສິນໃຈທຸ່ມທຶນເກືອບ 8 ລ້ານໂດລາສະຫະລັດສ້າງເສັ້ນທາງແຕ່ສາມແຍກໂຮງຮຽນເອເລັກໂຕຣ-ບ້ານດອນປ່າໃຫມ່-ຕະ ຫລາດສວນມອນທີ່ ເປັນເສັ້ນທາງຍຸດທະສາດສຳຄັນຂອງເມືອງສີສັດຕະນາກ ນະຄອນຫລວງວຽງຈັນ ໃຫ້ມີໃບຫນ້າໃຫມ່, ທັງເປັນການ ລະບາຍຄວາມຕິດຂັດໃນການສັນຈອນ ແລະ ເປັນເງື່ອນໄຂໃນການພັດທະນາເສດຖະກິດ-ສັງຄົມ ໂດຍຈະໃຫ້ສຳເລັດໃນທ້າຍປີຫນ້າ.
ພິທີເຊັນສັນຍາກໍ່ສ້າງໂຄງການດັ່ງກ່າວ ລະຫວ່າງອົງການພັດທະນາ ແລະ ບໍລິຫານຕົວເມືອງວຽງຈັນກັບບໍລິສັດເອເຊຍຮ່ວມພັດທະ ນາກໍ່ສ້າງໄດ້ຈັດຂຶ້ນ ໃນຕອນຄ່ຳຂອງວັນທີ 22 ທັນວາ 2010 ທີ່ໂຮງແຮມລາວພລາຊາ ໂດຍການເຂົ້າຮ່ວມຂອງທ່ານ ສີຫຸນ ສິດທິລື ໄຊ ຄະນະປະຈຳພັກ, ປະທານກວດກາພັກ-ລັດນະຄອນຫລວງວຽງຈັນ.
ຕາງຫນ້າລັດຖະບານເຊັນໂດຍທ່ານ ເກດແກ້ວ ສີຫາລາດ ຮອງປະທານອົງການພັດທະນາ ແລະ ບໍລິຫານຕົວເມືອງວຽງຈັນ, ທ່ານ ວິໄຊ ຊາວັນນາ ຫົວຫນ້າພະແນກແຜນການ ແລະການລົງທຶນນະຄອນຫລວງວຽງຈັນ ແລະ ທ່ານມານະຈິດ ຟອງສຸວັນ ຜູ້ອຳນວຍການ ບໍລິສັດເອເຊຍຮ່ວມພັດທະນາກໍ່ສ້າງ.
ໃນໂອກາດນີ້ ທ່ານ ເກດແກ້ວ ສີຫາລາດ ໄດ້ກ່າວໃຫ້ຮູ້ວ່າ: ເສັ້ນທາງແຕ່ໂຮງຮຽນເອເລັກໂຕຣ-ບ້ານດອນປ່າໃຫມ່-ຕະຫລາດ-ສວນ ມອນແມ່ນເປັນເສັ້ນທາງຍຸດທະສາດສຳຄັນຂອງເມືອງສີສັດຕະນາກ ປະຈຸບັນຍັງເປັນທາງດິນແດງກວ້າງ 7 ແມັດ, ຍາວ 2.800 ແມັດ ແລະຍັງບໍ່ທັນມີລະບົບລະບາຍນ້ຳທີ່ສົມບູນເທື່ອ, ສະນັ້ນເພື່ອຍົກລະດັບທາງໃຫ້ເປັນທາງໃນຕົວເມືອງທີ່ມີຄວາມກວ້າງຫນ້າທາງລົດແລ່ນ 11 ແມັດ, ມີທາງຍ່າງ 2 ຂ້າງກວ້າງຂ້າງລະ 1,50 ແມັດ, ພ້ອມມີຮ່ອງລະບາຍນ້ຳ, ລະບົບໄຟເຍືອງທາງ, ໄຟອຳນາດ ແລະປ້າຍສັນ ຍະລັກສັນຈອນຄົບຊຸດ ລັດຖະບານ ຈິ່ງໄດ້ຕັດສິນໃຈໃຫ້ບໍລິສັດເອເຊຍຮ່ວມພັດທະນາກໍ່ສ້າງຈຳກັດເຂົ້າກໍ່ສ້າງ ໂດຍເປັນຜູ້ລົງທຶນກ່ອນ ສ່ວນລັດຖະບານຈະຊຳລະສະສາງຄືນໃນເວລາ 5 ປີນັບແຕ່ສົກງົບປະມານນີ້ ເປັນຕົ້ນໄປ.
ເສັ້ນດັ່ງກ່າວແມ່ນຈະໃຊ້ງົບປະມານລົງທຶນເຖິງ 7.035 ລ້ານກວ່າໂດລາສະຫະລັດເມື່ອສໍາເລັດຈະຊ່ວຍໃຫ້ການລະບາຍລົດເຂົ້າ-ອອກ ຕົວເມືອງໄດ້ຄ່ອງຕົວ, ທັງຫລຸດຜ່ອນເວລາ, ໄລຍະທາງໃນການສັນຈອນແລະອຸບັດເຫດ ພ້ອມນັ້ນຍັງຈະເຮັດໃຫ້ຕົວເມືອງສີສັດຕະນາກ ມີໃບຫນ້າໃຫມ່ທີ່ສະອາດຈົບງາມນຳໄປສູ່ການສ້າງເງື່ອນໄຂທີ່ສຳຄັນໃນການພັດທະນາເສດຖະກິດ-ສັງຄົມຂອງເມືອງໃຫ້ມີການຂະຫຍາຍ ຕົວກວ່າເກົ່າ. ທ່ານ ຮອງຫົວຫນ້າ ອພບ ກ່າວ.
