ປະຈຸບັນ ການເກັບກູ້ເຂົ້ານາປີຂອງແຂວງສະຫວັນນະເຂດໄດ້ແລ້ວ 153.077 ເຮັກຕາ ຫລື ເທົ່າກັບ 95% ຈາກເນື້ອທີ່ປັກດຳຕົວ ຈິງ 161.678 ເຮັກຕາ. ສ່ວນການປູກພືດລະດູຝົນຕາມແຜນການໃນທົ່ວແຂວງມີ 14.225 ເຮັກຕາ ແຕ່ສາມາດປະຕິບັດໄດ້ຕົວຈິງພຽງ ແຕ່ 9.322 ເຮັກຕາ ເທົ່າກັບ 66% ຂອງແຜນການ.
ທ່ານ ຄຳມອນ ທິລາວົງ ຮອງຫົວຫນ້າຂະແຫນງປູກຝັງພະແນກກະສິກຳແລະປ່າໄມ້ແຂວງສະຫວັນນະເຂດລາຍງານໃຫ້ຮູ້ເມື່ອບໍ່ດົນ ມານີ້ວ່າ: ການຜະລິດເຂົ້ານາປີຂອງຊາວກະສິກອນພາຍໃນແຂວງສະຫວັນນະເຂດໃນປີນີ້ແມ່ນໄດ້ພົບກັບຄວາມຫຍຸ້ງຍາກຫລາຍປະການ ເປັນຕົ້ນແມ່ນສະພາບດິນຟ້າອາກາດທີ່ບໍ່ອຳນວຍໃຫ້ແກ່ການຜະລິດເຮັດໃຫ້ການຜະລິດເຂົ້ານາປີ ແລະການປູກພືດລະດູຝົນປີນີ້ບໍ່ສາມາດ ບັນລຸໄດ້ຕາມແຜນການທັງດ້ານເນື້ອທີ່ , ສະມັດຖະພາບ ແລະຜົນຜະລິດເຂົ້າລວມ. ບໍ່ວ່າຈະເປັນໃນໄລຍະຂອງການປັກດຳເຂົ້າກໍ່ໄດ້ເກີດ ມີສະພາບໄພແຫ້ງແລ້ງ ແລະ ພາຍຫລັງປັກດຳສຳເລັດກໍ່ຍັງໄດ້ເກີດມີໄພນ້ຳຖ້ວມຕື່ມອີກເປັນຕົ້ນແມ່ນໃນຕົ້ນເດືອນຕຸລາ ໄດ້ເກີດຝົນຕົກ ຫນັກຈາກພາຍຸມິນດູລີ ຈົນເປັນເຫດໃຫ້ເກີດນ້ຳຖ້ວມເຂົ້າເນື້ອທີ່ການຜະລິດຂອງຊາວກະສິກອນ ຈຳນວນ 17.525 ເຮັກຕາໃນ 11 ຕົວ ເມືອງ ແລະ ສາມາດປະເມີນຜົນເສຍຫາຍເບື້ອງຕົ້ນ 9 ຕົວເມືອງ ເຊິ່ງມີເນື້ອທີ່ເສຍຫາຍ 8.382 ເຮັກຕາ ເຊິ່ງເມືອງທີ່ໄດ້ຮັບຜົນກະທົບ ເນື້ອທີ່ນາເສຍຫາຍຫລາຍກວ່າຫມູ່ແມ່ນເມືອງ: ຊົນນະບູລີ 2.647 ເຮັກຕາ , ສອງຄອນ 2.085 ເຮັກຕາ , ວິລະບູລີ 1.411 ເຮັກຕາແລະ ເມືອງເຊໂປນ 1.289 ເຮັກຕາ. ສຳລັບການມ້ຽນມັດເຂົ້ານາປີຂອງຊາວກະສິກອນທີ່ຫລຸດແຜນການໃນປີນີ້ມາຮອດປະຈຸບັນສຳເລັດແລ້ວ 88.282 ເຮັກຕາ ຫລື ເທົ່າກັບ 55% ຂອງເນື້ອທີ່ແຜນການ ຫລື ເທົ່າກັບ 58% ຂອງເນື້ອທີ່ຄາດວ່າຈະໄດ້ເກັບກ່ຽວຕົວຈິງ 153.296 ເຮັກຕາ , ຄາດຄະເນສະມັດຖະພາບສະເລ່ຍທົ່ວແຂວງ 3,49 ເຮັກຕາ ຕໍ່ໂຕນ ແລະ ຜົນຜະລິດລວມ 535.003 ໂຕນ. ຫລຸດແຜນການ 90,850 ໂຕນ ແລະຫລຸດປີຜ່ານມາ 26.967 ໂຕນ. ທ່ານຮອງຫົວຫນ້າຂະແຫນງປູກຝັງຍັງໄດ້ເຜີຍໃຫ້ຮູ້ຕື່ມອີກວ່າ: ເພື່ອເປັນການທົດ ແທນຟື້ນຟູຜົນເສຍຫາຍຈາກໄພແຫ້ງແລ້ງ ແລະ ນ້ຳຖ້ວມທາງພາກສ່ວນຕ່າງໆທີ່ກ່ຽວຂ້ອງໄດ້ມີໂຄງການສົ່ງເສີມການປູກເຂົ້ານາແຊງໃນ ເນື້ອທີ່ 30.000 ເຮັກຕາ ໂດຍສຸມໃສ່ບັນດາເມືອງໃນທົ່ງພຽງບ່ອນທີ່ມີຊົນລະປະທານຈຸດສຸມ 10.000 ເຮັກຕາ ໃນນີ້ໄດ້ເລັງໃສ່ຊຸກຍູ້ສົ່ງ ເສີມຊາວກະສິກອນເຮັດກະເສດສຸມ ເພື່ອຍົກສະມັດຖະພາບໄດ້ສູງກວ່າ 5 ໂຕນ ຕໍ່ເຮັກຕາ ແລະ ໃນເຂດຊົນລະປະທານທົ່ວໄປຈຳນວນ 20.000 ເຮັກຕາ ແມ່ນສູ້ຊົນບໍ່ໃຫ້ສະມັດຕະພາບຫລຸດ 4,5 ໂຕນ ຕໍ່ເຮັກຕາ , ນອກນັ້ນ , ຍັງມີໂຄງການສົ່ງເສີມປູກຢາສູບ , ປູກສາລີອາ ຫານສັດ , ປູກຜັກປອດສານພິດ , ສົ່ງເສີມການປູກເຂົ້າຈ້າວ , ການປູກຫມາກໂມ , ການຜະລິດແນວພັນເຂົ້າ , ການປູກຖົ່ວດິນ ແລະ ໂຄງ ການປູກອ້ອຍ.
