Pasalao

    ປະຊາຊົນສ່ວນຫລາຍຂ້ອງໃຈນຳການຈຳຫນ່າຍເຄື່ອງທີ່ລະນຶກງານສະຫລອງ ນະຄອນຫລວງວຽງຈັນຄົບຮອບ 450 ປີ ໂດຍສະ ເພາະແມ່ນການຈຳຫນ່າຍປອກແຂນທີ່ເພິ່ນໄດ້ເອົາລົງໄປມອບໃຫ້ບ້ານແລ້ວນາຍບ້ານກໍ່ນຳໄປໃຫ້ລູກບ້ານຊື້ (ລັກສະນະຕ້ອງຊື້) ແລະ ອີກກໍລະນີ 1 ກໍ່ແມ່ນເອົາໄປຂາຍຕາມໂຮງຮຽນໃນລາຄາອັນລະ 16.000 ກີບຕໍ່ປອກແຂນ 1 ອັນ ເຊິ່ງຫລາຍຄວາມຄິດເຫັນເພິ່ນເຫັນ ວ່າແພງໂພດວ່າ ຊັນ....!

   ພະນັກງານທ່ານຫນຶ່ງ ປະຈຸບັນຢູ່ບ້ານສວນມອນກ່າວວ່າ: ຢູ່ທີ່ບ້ານຂອງເພິ່ນກໍ່ໄດ້ມີການເອົາປອກແຂນດັ່ງກ່າວຂາຍເຊັ່ນກັນ ໂດຍ ເພິ່ນໄດ້ກຳນົດໃຫ້ເຮືອນຫນຶ່ງຊື້ 2 ອັນ, ໂດຍໃຫ້ເຫດຜົນວ່ານີ້ ແມ່ນການລະດົມທຶນເພື່ອຊ່ວຍງານສະຫລອງ 450 ປີທີ່ຈະຈັດຂຶ້ນໃນ ເດືອນພະຈິກນີ້ ສຳລັບຜູ້ກ່ຽວເອງນັ້ນກໍ່ບໍ່ໄດ້ມີບັນຫາອັນໃດຂັດຂ້ອງຫາກເປັນການຊ່ວຍປະກອບສ່ວນໃຫ້ແກ່ປະເທດຊາດ, ໃນຄວາມ ເຫັນສ່ວນຕົວແລ້ວເຫັນ ວ່າລາຄາບໍ່ເຫມາະສົມປານໃດ ເພາະປອກແຂນດັ່ງກ່າວນີ້ເປັນປອກແຂນທີ່ເຮັດດ້ວຍຢາງຕິດກາທຸງຊາດລາວ ແລະ ຄຳຂວັນກ່ຽວກັບ 450 ປີ ເທົ່ານີ້ກໍ່ມີລາຄາຮອດ 16.000 ກີບ ແລະອີກຢ່າງຫນຶ່ງສິ່ງຂອງດັ່ງກ່າວຖ້າເບິ່ງຜິວເຜີນກໍ່ຄືວ່າບໍ່ມີຫຍັງ ແຕ່ເບິ່ງເລິກໆແລ້ວ ຮູບແບບການເຮັດປອກແຂນທີ່ລະນຶກນີ້ ໃນປີຜ່ານມາປາກົດວ່າປະເທດເພິ່ນບ້ານເພິ່ນໄດ້ຜະລິດສິ່ງຂອງທີ່ມີລັກສະ ນະຄືກັນນີ້ອອກມາກ່ອນແລ້ວ ດັ່ງນັ້ນຈິ່ງເຫັນວ່າເປັນການນຳແບບເພິ່ນເກີນໄປການເຮັດຂອງທີ່ລະນຶກຄວນຄຳນຶງເຖິງເອກະລັກຂອງເຮົາ ເອງຫລາຍກວ່າ (ເວົ້າດ້ວຍທ່າທີຈິງຈັງ).

   ນັກສຶກສາວິທະຍາໄລຄອມເຊັນເຕີກໍ່ເວົ້າໃນລັກສະນະດຽວກັນວ່າ: ຢູ່ທີ່ໂຮງຮຽນຂອງຂ້ອຍກໍ່ໄດ້ມີການເຜີຍແຜ່ກ່ຽວກັບເລື່ອງດັ່ງກ່າວ ເຊັ່ນກັນໂດຍເພິ່ນກຳນົດວ່າ ນັກສຶກສາຜູ້ຫນຶ່ງຕ້ອງປະກອບສ່ວນ 1 ອັນ, ເພື່ອເອົາເງິນຈຳນວນດັ່ງກ່າວໄປປະກອບເປັນທຶນໃນການປະ ຕິສັງຂອນວັດສີສະເກດ ເຊິ່ງຕົນເອງກໍ່ເຫັນວ່າລາຄາແພງໂພດ ແລະ ຮູບຮ່າງຂອງປອກແຂນກໍ່ມີລັກສະນະນຳແບບຂອງບ້ານໃກ້ເຮືອນ ຄຽງ.