Pasalao

        

ອີງ​ຕາມ​ການ​ລາຍ​ງານ​ຂ່າວ​ຂອງ ໜັງສືພິມ​ວຽງ​ຈັນ​​ໃໝ່ ໜັງສືພິມ​ທາງ​ການ​ຂອງ​ນະຄອນຫຼວງວຽງ​ຈັນ ​ສະບັບ​ອອກ​ວັນ​ທີ 23 ສິງຫາ ​ໃຫ້​ຮູ້​ວ່າ ​ໄດ້​ເກີດ​ມີ​​ເລື່ອງ​ເສົ້າສະຫຼົດ​ໃຈ ​ເມື່ອ​ມີ​ຄົນ​ຮ້າຍ​ລັກ​ຂ້າ​ຊ້າງ​ຢູ່​ເສັ້ນທາງ ​ເລກທີ 13 ​ເໜືອ.

         ທ້າວ​ ພອນ​ໄຊ ອາຍຸ 30 ປີ ປະຊາຊົນ​ຢູ່​ບ້ານ​ທາດ ​ເມືອງ​ທົ່ງ​ມີ​ໄຊ ​ແຂວງ​ໄຊ​ຍະ​ບູລີ ​ໄດ້​ສູນ​ເສຍ​ຊ້າງ 1 ​ເຊືອກ​ ​ໄປ ​ໃນ​ຈຳນວນ​ຊ້າງ 4 ​​ເຊືອກ ທີ່​ລ້ຽງ​ມາ​ຫຼາຍປີ ​ເມື່ອ​ມີ​ຄົນ​ຮ້າຍ​ລັກ​ຂ້າ​ຢູ່​ເຂດ​​ໃກ້​ກັບ​ເສັ້ນ​ທາງ​ເລກ 13 ​ເໜືອ ​ໄກ​ຈາກ​ຕົວ​ເມືອງ​ຫິນ​ເຫີບ ​ແຂວງ​ວຽງ​ຈັນ ປະມານ 2 ກິ​ໂລ​ແມັດ ​ໃນ​ຕອນ​ຄ່ຳ​ຂອງ​ວັນ​ທີ 9 ສິງຫາ​ທີ່​ຜ່ານ​ມາ, ວຽງ​ຈັນ​ໃໝ່​ກ່າວ.

         ທ້າວ ພອນ​ໄຊ ​ເລົ່າ​ວ່າ “​​ໃນ​ຄືນ​ທີ່​ເກີດ​ເຫດ ຕົນ​ເອງ​ໄດ້​ຍິນ​ສຽງ​ປືນ​ດັງ​ຢູ່​ຈຸດ​ທີ່​ຕົນ​ເອງ​ຜູກ​ຊ້າງ​ໄວ້ ​ແລ້ວ​ຕົນ​ເອງ​ຈຶ່ງ​ຟ້າ​ວ​ແລ່ນ​ໄປ​ເຖິງ​ຈຶ່ງ​ເຫັນ​ຄົນ​ຮ້າຍ​ໄດ້​ຂ້າ​ຊ້າງ​ຂອງ​ຕົນ​ເອງ​ເສຍ​ແລ້ວ, ​ເມື່ອ​ຄົນ​ຮ້າຍ​ເຫັນ​ຕົນ ​ເຂົາ​ກໍ​ໄດ້​ຍິງ​ປືນ​ໃສ່​ຕົນ​ແຕ່​ບໍ່​ຖືກ ​ເມື່ອ​ເຫັນ​ທ່າ​ບໍ່​ດີ ຕົນ​ເອງ​ຈຶ່ງ​ໄດ້​ຍິງ​ປືນ​ຕອບ​ໂຕ​ໄປ ​ເປັນ​ເຫດ​ໃຫ້​ມີ​ຄົນ​ຮ້າຍ​ຖືກ​ລູກປືນ​ເສຍ​ຊີວິດ​ຄາ​ທີ່​ 1 ​ຄົນ ​ແລະ​ຍັງ​ອີກ 3 ຄົນ ​ໄດ້​ລົບ​ໜີ​ໄປ​ໄດ້.

         ຊ້າງ​ເຊືອກ​ທີ່​ຖືກ​ຂ້າ​ເປັນ​ຊ້າງ​ເຖິກ ມີ​ງາ ຄົນ​ຮ້າຍ​ໄດ້​ຕັດ​ງາ​ອອກ​ໄປ​ແລ້ວ 1 ງາ ​ແຕ່​ບໍ່​ທັນ​ໄດ້​ເອົາ​ໄປ ສ່ວນ​ຄົນ​ຮ້າຍ​ທີ່​ຍັງ​ຫຼົບໜີ​ນັ້ນ ​ເຈົ້າໜ້າ​ທີ່ ປກສ ​ເມືອງ​ຫິນ​ເຫີບ ກຳລັງ​ຕິດຕາມ​ຈັບ​ໂຕ​ມາ​ລົງ​ໂທດ​ຕາມກົດໝາຍ. ສ່ວນ​ຄົນ​ຮ້າຍ​ທີ່​ເສຍ​ຊີວິດ​ ​ເຈົ້າໜ້າ​ທີ່​ຍັງ​ສືບສວນ-ສອບ​ສວນ​ຕື່ມ.

          ​ເຫດການ​ດັ່ງກ່າວ​ນີ້​ໄດ້​ສ້າງ​ຄວາ​ມສູນ​ເສຍ​ອັນ​ໃຫຍ່​ຫຼວງຕໍ່​ກັບ​ປະຊາກອນ​ຊ້າງ​ໃນ​ບ້ານ​ເຮົາ ອັນ​ເປັນ​ສັດ​ຄູ່​ບ້ານ​ຄູ່​ເມືອງ​ແລະ​ເປັນ​ສັດ​ໃກ້​ຈະ​ສູນພັນ ​ໃຫ້​ນັບ​ມື້ຫຼຸດໜ້ອຍ​ລົງ.