Pasalao

 ຂ່າວ: ຈັນສີ

   ລາວຈະມີສູນອິນເຕີເນັດແຫ່ງຊາດ ເພື່ອເຮັດຫນ້າທີ່ຄຸ້ມຄອງລະບົບການສື່ສານຝ່າຍອິນເຕີເນັດອັນເປັນການຢຸດຕິການເຊື່ອມຕໍ່ລະ ບົບອິນເຕີເນັດຈາກປະເທດເພື່ອນບ້ານ, ແຕ່ນີ້ຕໍ່ໄປຈະສາມາດສະຫນອງຄວາມຕ້ອງການມວນຊົນໄດ້ຢ່າງມີປະສິດທິພາບຊັດເຈນ, ວ່ອງ ໄວ, ມີຄວາມສົມດຸນດ້ານລາຄາ ແລະ ເປັນລະບົບຫລາຍຂຶ້ນ ຫລັງພາກລັດຕັດສິນໃຈທຸ່ມທຶນຫລາຍກວ່າ 20 ລ້ານໂດລາສະຫະລັດ ສ້າງສູນແຫ່ງນີ້ຂຶ້ນ; ໃນຂະນະທີ່ ບັນຫາອິນເຕີເນັດຕົກ, ໂທລະສັບຂັດຂ້ອງກໍ່ຈະໄດ້ຮັບການແກ້ໄຂ ເມື່ອສູນໃຫຍ່ແຫ່ງນີ້ເປີດບໍລິການ ເຕັມຕົວໃນທ້າຍປີນີ້.

   ສູນອິນເຕີເນັດແຫ່ງຊາດ ເຊິ່ງຂຶ້ນກັບອົງການໄປສະນີ ແລະ ໂທລະຄົມມະນາຄົມແຫ່ງຊາດ ຈະມາເຮັດຫນ້າທີ່ໃນການຄວບຄຸມລະ ບົບອິນເຕີເນັດ, ໂທລະສັບລວມທັງລະບົບເຕັກໂນໂລຊີຂໍ້ມູນຂ່າວສານທີ່ເອີ້ນວ່າ Call Center ເພື່ອຮັບຜິດຊອບຄຸ້ມຄອງລະບົບໂທລະ ສັບ ແລະ ອິນເຕີເນັດພາຍໃນປະເທດ, ຄຸ້ມຄອງບັນດາບໍລິສັດທີ່ໃຫ້ການບໍລິການໂທລະສັບອິນເຕີເນັດ ແລະ ມີການພົວພັນກັນກັບປະ ເທດອື່ນໆດ້ວຍລະບົບດັ່ງກ່າວນີ້ຜ່ານປະຕູດຽວ.

   ຕາມການໃຫ້ສຳເລັດຂອງ ທ່ານ ສົມນຶກ ໂພທິລາດ ຜູ້ອຳນວຍການສູນອິນເຕີເນັດແຫ່ງຊາດ ໃຫ້ຮູ້ວ່າ: ໃນໄລຍະຜ່ານມາປະເທດ ລາວເຮົາຍັງບໍ່ທັນມີສູນອິນເຕີເນັດແຫ່ງຊາດ ເພື່ອເປັນຜູ້ກວດສອບ, ຄຸ້ມຄອງລວມລະບົບອິນເຕີເນັດໂດຍສະເພາະ ເຖິງວ່າໄດ້ຮັບການ ອະນຸມັດຈາກອົງການສາກົນທີ່ມອບລະຫັດຂອງປະເທດລາວ (.la) ໃຫ້ເປັນລະຫັດສູງສຸດຂອງລະບົບອິນເຕີເນັດ ແຕ່ລາວເຮົາຍັງບໍ່ມີ ເງື່ອນໄຂພຽງພໍທີ່ຈະໃຫ້ບໍລິການ, ດັ່ງນັ້ນ ລັດຖະບານກໍ່ຄືຄະນະຮັບຜິດຊອບວຽກງານ (ຄະນະຄຸ້ມຄອງອິນເຕີເນັດແຫ່ງຊາດ) ຈິ່ງໃຫ້ ຕ່າງປະເທດໄປບໍລິການນັບແຕ່ປີ 2000; ສ່ວນລະບົບອິນເຕີເນັດຂອງລາວກໍ່ຕໍ່ຈາກປະເທດເພື່ອນບ້ານເຮັດໃຫ້ເກີດຄວາມຫຍຸ້ງຍາກໃນ ຫລາຍດ້ານ.

   ເພື່ອສ້າງຄວາມສະດວກແກ່ບັນດາບໍລິສັດທີ່ເຮັດທຸລະກິດກ່ຽວກັບອິນເຕີເນັດ, ໂທລະສັດ, ຂໍ້ມູນສື່ສານຕ່າງໆພາຍໃນປະເທດລັດ ຈິ່ງຕັດສິນໃຈກູ້ເງິນ 20 ລ້ານກວ່າໂດລາສະຫະລັດຈາກ ສປ ຈີນ ສ້າງສູນອິນເຕີເນັດແຫ່ງຊາດຂຶ້ນ. ມາຮອດປະຈຸບັນສຳເລັດປະມານ 59% ຫລັງຈາກທີ່ເລີ່ມກໍ່ສ້າງມາແຕ່ເດືອນເມສາປີກາຍ, ຄາດວ່າຈະສຳເລັດ ແລະ ເປີດໃຫ້ບໍລິການໄດ້ໃນເດືອນກັນຍາປີນີ້ ພ້ອມນຳ ເອົາລະຫັດ .la ມາບໍລິຫານເອງຢູ່ໃນປະເທດ.

   ແຕ່ນີ້ຕໍ່ໄປສູນອິນເຕີເນັດແຫ່ງຊາດ ຈະເປັນຜູ້ຄຸ້ມຄອງບໍລິຫານວຽກງານເຕັກນິກນິຕິກຳ, ນະໂຍບາຍ, ລະບຽບການນຳໃຊ້ລະບົບໂທ ລະສັບອິນເຕີເນັດໃຫ້ມີຄວາມເປັນເອກະພາບລະຫວ່າງມະຫາພາກກັບຈຸລະພາກໃນຂອບເຂດທົ່ວປະເທດ ແລະ ທີ່ສຳຄັນຈະຊ່ວຍຄຸ້ມຄອງດ້ານລາຄາການນຳໃຊ້ໃຫ້ຖືກຕ້ອງສອດຄ່ອງຕາມເງື່ອນໄຂການລົງທຶນຂອງປະເທດກໍ່ຄືທຸລະກິດ, ທ່ານ ສົມນຶກ ໂພທິລາດ ກ່າວ.

   ທ່ານຢ້ຳວ່າ: ເມື່ອສູນນີ້ໃຫ້ບໍລິການເຕັມຕົວຈະເພີ່ມຄວາມສະດວກແກ່ບັນດາບໍລິສັດທີ່ເຮັດທຸລະກິດຕ່າງໆ ບໍ່ຈຳເປັນຕ້ອງໄປອາໄສຕໍ່ ຈາກຕ່າງປະເທດອີກ ເຊິ່ງຈະຊ່ວຍສະຫນອງການຊົມໃຊ້ຢູ່ພາຍໃນໄດ້ຢ່າງພຽງພໍ. ອັດຕາການໃຊ້ຈ່າຍໃນຂົງເຂດວຽກງານດັ່ງກ່າວ ຈະຖືກລົງ, ຄວາມໄວສູງຂຶ້ນ; ຂະນະດຽວກັນບັນຫາອິນເຕີເນັດຕົກ, ໂທລະສັບຂັດຂ້ອງກໍ່ໃຫ້ໄດ້ຮັບການແກ້ໄຂ.

   ທ່ານໃຫ້ຮູ້ອີກວ່າ ເພື່ອເປັນການທົດສອບສູນການບໍລິການໃຫຍ່ແຫ່ງນີ້ກັບຄວາມຮູ້, ຄວາມສາມາດຂອງບຸກຄະລາກອນຈຳນວນກວ່າ 100 ທ່ານ ທີ່ປະກອບເຂົ້າໃຫມ່ ເຊິ່ງໄດ້ຜ່ານການຝຶກຝົນຈາກວິຊາການທີ່ມີປະສົບການສູງຂອງ ສປ ຈີນ ແລະ ສສ ຫວຽດນາມ ກ່ອນ ການມອບຮັບສູນຢ່າງເປັນທາງການ ແລະ ເປີດໃຊ້ງານແມ່ນຈະເລ່ງເຊື່ອມຕໍ່ກັບບັນດາບໍລິສັດທີ່ກ່ຽວຂ້ອງເປັນຕົ້ນ 7 ບໍລິສັດຫລັກຄື: ອີ ທີແອວ, ລາວໂທລະຄົມ, ສະຕາໂທລະຄົມ, ມີລີຄອມ(ທິໂກ), ພຣາເນັດ, ສະກາຍເທເລຄອມ, ສະພາວິທະຍາສາດໃຫ້ສຳເລັດໃນເດືອນ ສິງຫານີ້ ພ້ອມເດີນຫນ້າກວດສອບ, ເບິ່ງແຍງເຄື່ອງມືຕ່າງໆໃຫ້ເປັນກ່ອນມື້ເປີດຕົວຈິງ.