Pasalao

ລັດ​ວິ​ສາ​ຫະ​ກິດ​ໄຟຟ້າ​ລາວ (​ຟຟລ) ໄດ້​ເຫັນ​ດີ​ປັບ​ລາຄາ​ໄຟຟ້າ​ຊົມໃຊ້​ທົ່ວ​ປະເທດ ໃນ​ລະບົບ​ຕາ​ຂ່າຍ​ຂອງ ​ຟຟລ ເລີ່ມ​ແຕ່​ຮອບ​ໃບ​ເກັບ​ເງິນເດືອນ 3/2012 ຈົນ​ຮອດ​ເດືອນ 12/2017 ຕາມ​ນະໂຍບາຍ​ຂອງ​ລັດຖະບານ ໂດຍ​ແຕ່​ລະ​ປີ​ຈະ​ເພີ່ມ​ຂຶ້ນ 2% ດັ່ງນີ້: ນັບ​ແຕ່​ປີ 2012-2017 ອັດຕາ​ການ​ຊົມໃຊ້​ໄຟຟ້າ​ແຕ່ 0-25 KWH ຈາກ​ລາຄາ 294 ເປັນ 355 ກີບ; 26-150 KWH ຈາກ​ລາຄາ 350 ເປັນ 422 ກີບ; ສຳລັບ​ການ​ຊົມໃຊ້​ແຕ່ 150 KWH ຂຶ້ນ​ໄປ ປີ 2012: ຈາກ​ລາຄາ 845 ເປັນ 1.019 ກີບ.

ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ຊ່ວຍ​ວ່າການ​ກະຊວງ​ພະລັງງານ ແລະ ບໍ່​ແຮ່​ເປີດເຜີຍ​ວ່າ: ອັດຕາ​ລາຄາ​ໄຟຟ້າ​ໃໝ່​ນີ້ ບໍ່​ໃຫ້​ນຳ​ໃຊ້​ຕໍ່​ບັນດາ​ໂຄງການ​ທີ່​ໄດ້​ມີ​ສັນຍາ​ຊື້-ຂາຍ​ກະແສ​ໄຟຟ້າ​ໂດຍ​ກົງ​ຈາກ​ການ​ນຳ​ເຂົ້າ ໂດຍ​ສະເພາະ ບໍ່​ຄຳ​ເຊ​ໂປນ, ເຂດ​ເສດຖະກິດ​ພິເສດ​ດອກ​ງິ້ວ​ຄຳ, ບໍ່​ເຕັນ​ແດນ​ຄຳ ແລະ ບາງ​ໂຄງການ​ທີ່​ຊົມໃຊ້​ພະລັງງານ​ໄຟຟ້າ​ຈາກ​ການ​ນຳ​ເຂົ້າ, ລາຄາ​ໄຟຟ້າ​ໃໝ່​ນີ້ ຍັງ​ບໍ່​ລວມ​ອາກອນ​ມູນ​ຄ່າ​ເພີ່ມ​ທີ່​ກົດໝາຍ​ກຳນົດ. ການ​ກຳນົດ​ລາຄາ​ຈຳໜ່າຍ​ໄຟຟ້າ​ຂອງ ​ສປປ ລາວ ແມ່ນ​ເອກະ​ພາບ​ໃນ​ທົ່ວ​ປະເທດ ຊຶ່ງ​ໄດ້​ຄຳນວນ​ມາ​ຈາກ​ການ​ລົງທຶນ​ສະເລ່ຍ ຂອງ​ລະບົບ​ສະໜອງ​ອຸດສາຫະກຳ​ໄຟຟ້າ​ທັງ​ໝົດ ໃນ​ໄລຍະ 10 ປີ​ຕໍ່ໜ້າ ບົນ​ເງື່ອນໄຂ​ບໍ່​ໃຫ້​ມີ​ຜົນ​ກະທົບ​ຕໍ່​ນະໂຍບາຍ ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ທີ່​ພັກ-ລັດ​ວາງ​ອອກ. ຢ່າງໃດ​ກໍ່​ຕາມ ຖ້າ​ທຽບໃສ່​ກັບ​ບັນດາ​ປະເທດ​ເພື່ອນ​ບ້ານ ລາຄາ​ໄຟຟ້າ​ຢູ່ ​ສປປ ລາວ ຍັງ​ຖືກ​ກວ່າ​ເຊັ່ນ: ​ສປປ ລາວ ມີ​ປະຊາກອນ 6,4 ລ້ານ​ຄົນ, ມີ​ກຳລັງ​ຕິດ​ຕັ້ງ​ໄຟຟ້າ 2.552 MW, ອັດຕາ​ການ​ຊົມໃຊ້ 80%, ລາຄາ 7,8 ເຊັນ/kwh; ກຳປູເຈຍ 15 ລ້ານ​ຄົນ, ກຳລັງ​ຕິດ​ຕັ້ງ​ໄຟຟ້າ 360 MW, ອັດຕາ​ການ​ຊົມໃຊ້ 24%, ລາຄາ 19 ເຊັນ/kwh; ໄທ 68 ລ້ານ​ຄົນ, ກຳລັງ​ຕິດ​ຕັ້ງ​ໄຟຟ້າ 31.485 MW, ອັດຕາ​ການ​ຊົມໃຊ້ 87%, ລາຄາ 10,2 ເຊັນ/kwh; ໃນ​ຂະນະ​ທີ່​ຫວຽດນາມ 85,5 ລ້ານ​ຄົນ, ມີ​ກຳລັງ​ຕິດ​ຕັ້ງ 18.494 MW, ລາຄາ 5,7 ເຊັນ/kwh; ເມື່ອ​ທຽບໃສ່​ປະເທດ​ທີ່​ມີ​ການ​ເຕີບ​ໂຕ​ທາງ​ເສດຖະກິດ​ຢ່າງ​ຍີ່ປຸ່ນ 127 ລ້ານ​ຄົນ, ກຳລັງ​ຕິດ​ຕັ້ງ 228.479 MW, ອັດຕາ​ການ​ຊົມໃຊ້ 100%, ລາຄາ 18,5 ເຊັນ/kwh.

ລັດຖະມົນຕີ​ຊ່ວຍ​ວ່າການ​ກະຊວງ​ພະລັງງານ ແລະ ບໍ່​ແຮ່​ກ່າວ​ຕື່ມ​ວ່າ: ປັດຈຸບັນ​ການ​ດຳເນີນ​ທຸລະ​ກິດ​ຂອງ ​ຟຟລ ເຫັນ​ວ່າ​ຕົວ​ເລກ​ໜີ້​ຄ້າງ​ຈ່າຍ​ຄ່າ​ກະແສ​ໄຟຟ້າ ມີ​ທ່າ​ອ່ຽງ​ເພີ່ມ​ຂຶ້ນ ໂດຍ​ທົ່ວ​ປະເທດ​ມີ​ປະມານ 400 ກວ່າ​ຕື້​ກີບ, ໃນ​ນີ້​ສະເພາະ​ຢູ່​ນະຄອນຫຼວງ​ວຽງ​ຈັນ ມີ​ຫຼາຍ​ກວ່າ 200 ກວ່າ​ຕື້​ກີບ, ເນື່ອງ​ຈາກ​ການ​ເກັບ​ເງິນ​ຈາກ​ຜູ້​ຊົມໃຊ້​ໄຟຟ້າ ບໍ່​ໄດ້​ຕາມ​ແຜນການ, ເຫດຜົນ​ໜຶ່ງ​ແມ່ນ​ຈາກ​ຄວາມ​ບໍ່​ໂປ່ງ​ໃສ​ຂອງ​ພະນັກງານ​ພາຍ​ໃນ ແຕ່​ກໍ່​ໄດ້​ຮັບ​ການ​ປະຕິບັດ​ລະບຽບ​ວິໄນ. ໃນ​ໄລຍະ​ຜ່ານ​ມາ ແມ່ນ​ມີ​ຄວາມ​ຈຳເປັນ​ຕ້ອງ​ມີ​ການ​ລົງທຶນ​ຢ່າງ​ຫຼວງຫຼາຍ ເຂົ້າ​ໃນ​ການ​ພັດທະນາ​ຂະແໜງ​ພະລັງງານ ເພື່ອ​ສະໜອງ​ໄຟຟ້າ​ຮັບ​ໃຊ້​ສັງຄົມ​ໃຫ້​ພຽງພໍ ເປັນຕົ້ນ: ການ​ລົງທຶນ​ໃສ່​ພາກ​ຜະລິດ, ພາກ​ສາຍ​ສົ່ງ​ໄຟຟ້າ​ແຮງ​ດັນ​ສູງ, ພາກ​ສະຖານີ​ໄຟຟ້າ ແລະ ພາກ​ຈຳໜ່າຍ​ໄຟຟ້າ ຊຶ່ງ​ເປັນ​ການ​ລົງທຶນ​ທັງ​ພາກ​ລັດ ແລະ ເອກ​ກະ​ຊົນ​ພາຍ​ໃນ ແລະ ຕ່າງປະເທດ. ທັງ​ນີ້​ກໍ່​ແນໃສ່​ບັນລຸ​ເປົ້າ​ໝາຍ​ທີ່​ພັກ-ລັດຖະບານ​ກຳນົດ​ໄວ້ ແມ່ນ​ຈະ​ສູ້​ຊົນ​ໃຫ້​ມີ​ໄຟຟ້າ​ຊົມໃຊ້​ຖາວອນ​ໃນ​ປີ 2015 ແລະ 90% ໃນ​ປີ 2020.