ງານມະຫາກຳກິລາແຫ່ງຊາດ ຄັ້ງທີ VIII ຫລື ຈຳປາສັກ ເກມ ທີ່ເປີດສາກແຂ່ງຂັນກັນມາ ແຕ່ວັນທີ 12 ທັນວາ ໄດ້ປິດສາກລົງຢ່າງຍິ່ງໃຫຍ່ ໃນມື້ວານນີ້ (ວັນທີ 22 ທັນວາ) ໂດຍການເປັນກຽດເຂົ້າຮ່ວມຂອງ ພະນະທ່ານ ສົມສະຫວາດ ເລັ່ງສະຫວັດ, ກຳມະການ ກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ປະຈຳການລັດຖະບານ, ປະທານຈັດງານ ມະຫາກຳກິລາຊີເກມ ຄັ້ງທີ 25, ທ່ານ ສອນໄຊ ສີພັນດອນ, ເຈົ້າແຂວງ ແຂວງຈຳປາສັກ, ປະທານຈັດງານ ມະຫາກຳກິລາແຫ່ງຊາດ ຄັ້ງທີ VIII, ບັນດາລັດຖະມົນຕີວ່າການ, ຊ່ວຍວ່າການ, ເຈົ້າແຂວງ, ຮອງເຈົ້າແຂວງ ຕະຫລອດຮອດພໍ່ແມ່ປະຊາຊົນ ຊາວແຂວງຈຳປາສັກ ເຕັມຄວາມບັນຈຸຂອງບ່ອນນັ່ງ ໃນສະຫນາມແຂວງຈຳປາສັກ.
ໃນພິທີປິດ , ທ່ານ ດຣ.ພູທອງ ແສງອາຄົມ, ລັດຖະມົນຕີ ປະຈຳສຳນັກງານ ນາຍົກ ລັດຖະມົນຕີ, ປະທານ ຄະນະກຳມະການກິລາແຫ່ງຊາດ, ທັງເປັນຮອງປະທານ ຈັດງານແຂ່ງຂັນ ຈຳປາສັກ ເກມ, ໄດ້ຂຶ້ນກ່າວສະຫລຸບລາຍງານ ຜົນການແຂ່ງຂັນ ເຊິ່ງມີບາງຕອນ ທ່ານກ່າວວ່າ: “ງານມະຫາກຳກິລາຄັ້ງນີ້ ໄດ້ສຳເລັດຜົນຕາມຈຸດປະສົງລະດັບຄາດຫມາຍທີ່ວາງໄວ້ທຸກປະການ, ມີ 29 ພາກສ່ວນເຂົ້າຮ່ວມ ຄືມີ 17 ແຂວງ, 10 ກະຊວງ ແລະ 2 ອົງການທຽບເທົ່າ, ມີ 24 ປະເພດກິລາ ເຊັ່ນ: ກະຕໍ້, ກ໊ອຟ, ບິນລຽດ-ສະນຸກເກີ, ຍິງປືນ, ດອກປີກໄກ່, ເຕະບານ, ເທຄວັນໂດ, ເທັນນິສ, ປິ່ງປ່ອງ, ບານບ້ວງ, ບານສົ່ງ, ເປຕັງ, ມວຍສາກົນ, ມວຍລາວ, ແລ່ນ-ລານ, ລົດຖີບ, ກາຣາເຕໂດ, ເຮືອຊ່ວງ, ຫນ້າເກັກ, ຫມາກຂ່າງ, ຢູໂດ, ລອຍນ້ຳ, ໂບລິ້ງ, ມວຍປັນຈະສີລັດ, ຈຳນວນນັກກິລາທັງຫມົດ 6.918 ຄົນ ເປັນຍິງ 1.093 ຄົນ. ມີການຊີງໄຊກັນ 821 ຫລຽນ, 234 ຫລຽນຄຳ, 233 ຫລຽນເງິນ ແລະ 464 ຫລຽນທອງ”.
ທ່ານ ດຣ.ພູທອງ ແສງອາຄົມ ກ່າວຕື່ມວ່າ: “ຜົນສຳເລັດຂອງງານມະຫາກຳກິລາ ແຫ່ງຊາດຄັ້ງນີ້ ແມ່ນຜົນງານທັງຊາດ ໂດຍໄດ້ຮັບການຊີ້ນຳຈາກລັດຖະບານຢ່າງໃກ້ຊິດ ໂດຍສະເພາະແມ່ນການປະກອບສ່ວນຢ່າງຕັ້ງຫນ້າຂອງຄະນະກຳມະການຈັດງານມະຫາກຳກິລາລະດັບຊາດ, ບັນດາກຳມະການຕັດສິນຂອງສູນກາງ-ທ້ອງຖິ່ນ, ກຳມະການຝ່າຍຕ່າງໆຂອງແຂວງຕະຫລອດຮອດນັກກິລາທຸກຄົນ ທີ່ເຂົ້າຮ່ວມ. ການແຂ່ງຂັນຄັ້ງນີ້ ຈະເປັນປະຖົມປັດໄຈ ຫ້າງຫາກະກຽມໄປສູ່ການຮອງຮັບເປັນເຈົ້າພາບຊີເກມ ຄັ້ງທີ 25 ປີ 2009 ທີ່ຈະມາເຖິງ”.
ຈາກນັ້ນ ພະນະທ່ານ ສົມສະຫວາດ ເລັ່ງສະຫວັດ ໄດ້ຂຶ້ນກ່າວປິດການແຂ່ງຂັນ ຢ່າງເປັນທາງການ ເຊິ່ງທ່ານໄດ້ຕີລາຄາ ແລະ ໄດ້ຕາງຫນ້າໃຫ້ການນຳພັກ ແລະ ລັດຖະບານ ສະແດງຄວາມຍ້ອງຍໍ ຊົມເຊີຍຄະນະຮັບຜິດຊອບຈັດງານທັງຫມົດ ທີ່ເຮັດຫລ້ອນຫນ້າທີ່, ທຸ້ມເທສະຕິປັນຍາ, ກຳລັງວັງຊາ, ຮັບປະກັນທັງຄວາມປອດໄພ ແລະ ຄວາມສະຫງົບຮຽບຮ້ອຍຂອງສັງຄົມ ເຊິ່ງມີບາງຕອນທ່ານກ່າວວ່າ: “ຕະຫລອດໄລຍະການແຂ່ງຂັນ ປວງຊົນລາວທັງຫລາຍກໍຄືພີ່ນ້ອງຊາວລາວຢູ່ຕ່າງປະເທດ ແລະ ເພື່ອນມິດສາກົນ ໄດ້ເອົາໃຈໃສ່ຕິດຕາມງານມະຫາກຳກິລາແຫ່ງຊາດ ຂອງພວກເຮົາຄັ້ງນີ້ ແລະຕ່າງກໍມີຄວາມດີອົກດີໃຈທີ່ເຫັນວ່າມະຫາກຳກິລາແຫ່ງຊາດຄັ້ງທີ VIII ຫລືຈຳປາສັກ ເກມ ໄດ້ດຳເນີນໄປໃນບັນຍາກາດ ແຫ່ງຄວາມເບີກບານມ່ວນຊື່ນ, ສາມັກຄີ, ແລະ ສ້າງສະຖິຕິໃຫມ່ຫລາຍອັນ ທີ່ເປັນຫນ້າປະທັບໃຈ, ສາມາດເວົ້າໄດ້ວ່າງານມະຫາກຳກິລາແຫ່ງຊາດຄັ້ງນີ້ ໄດ້ບັນລຸຜົນສຳເລັດຢ່າງຈົບງາມ”.
ພະນະທ່ານ ສົມສະຫວາດ ເລັ່ງສະຫວັດ ຍັງສະແດງຄວາມຫວັງວ່າ ທຸກຄົນຈະເອົາໃຈໃສ່ສະຫລຸບຖອດຖອນບົດຮຽນ ແນໃສ່ເຮັດໃຫ້ຂະບວນກິລາຂອງປະເທດເຮົາ ມີບາດກ້າວຂະ ຫຍາຍຕົວໃຫມ່ທີ່ເດັ່ນຊັດ, ໂດຍສະເພາະແມ່ນຮຽກຮ້ອງໃຫ້ບຸກຫນ້າບືນຕົວຕື່ມອີກ ເພື່ອກະ ກຽມໃຫ້ດີແກ່ການເປັນເຈົ້າພາບ ງານມະຫາກຳກິລາຊີເກມ ຄັ້ງທີ 25 ທີ່ ສປປລາວ ຈະເປັນເຈົ້າພາບ ໃນທ້າຍປີ 2009 ນີ້.
ຫລັງຈາກນັ້ນ ເປັນພິທີມອບທຸງກິລາແຫ່ງຊາດ ໃຫ້ແກ່ແຂວງຫລວງພະບາງ ທີ່ຈະສືບຕໍ່ເປັນເຈົ້າພາບ ຄັ້ງຕໍ່ໄປ ຫລື ຄັ້ງທີ IX ໃນປີ 2011 ເຊິ່ງຂຶ້ນຮັບໂດຍທ່ານ ບຸນເຮືອງ ດວງພະຈັນ, ກຳມະການສູນກາງພັກ, ເລຂາພັກແຂວງ ເຈົ້າແຂວງ ແຂວງຫລວງພະບາງ.
ໂດຍ: ຄົນຂ້າງສະຫນາມ
ຈາກລັດຖະບານຢ່າງໃກ້ຊິດ ໂດຍສະເພາະແມ່ນການປະກອບສ່ວນຢ່າງຕັ້ງຫນ້າຂອງຄະນະກຳມະການຈັດງານມະຫາກຳກິລາລະດັບຊາດ, ບັນດາກຳມະການຕັດສິນຂອງສູນກາງ-ທ້ອງຖິ່ນ, ກຳມະການຝ່າຍຕ່າງໆຂອງແຂວງຕະຫລອດຮອດນັກກິລາທຸກຄົນ ທີ່ເຂົ້າຮ່ວມ. ການແຂ່ງຂັນຄັ້ງນີ້ ຈະເປັນປະຖົມປັດໄຈ ຫ້າງຫາກະກຽມໄປສູ່ການຮອງຮັບເປັນເຈົ້າພາບຊີເກມ ຄັ້ງທີ 25 ປີ 2009 ທີ່ຈະມາເຖິງ”.
